സ്പാനിഷ് സ്ട്രൈക്കർ ആൽവാരോ മൊറാട്ട സീരി എ ക്ലബ് കോമോയുമായി വ്യക്തിപരമായ നിബന്ധനകളിൽ ധാരണയിലെത്തിയതായി റിപ്പോർട്ടുകൾ. കരാർ തയ്യാറാണെന്നും ക്ലബ്ബിലേക്കുള്ള മാറ്റത്തിന് മൊറാട്ട സമ്മതം മൂളിയതായും വിവരങ്ങൾ പുറത്തുവന്നു.
നിലവിൽ എ.സി. മിലാനിൽ നിന്ന് ഗലാറ്റസറേയിൽ ലോണിൽ കളിക്കുന്ന മൊറാട്ടയ്ക്ക് 2026 ജനുവരി വരെയാണ് കരാറുള്ളത്.
എന്നാൽ കോമോയിലേക്ക് മാറുന്നതിന് ഈ ലോൺ കരാർ റദ്ദാക്കേണ്ടതുണ്ട്. ഇതിനായുള്ള ചർച്ചകൾ എ.സി. മിലാനും ഗലാറ്റസറേയും തമ്മിൽ സജീവമായി നടക്കുകയാണ്. ലോൺ കാലാവധി അവസാനിക്കുന്നതിന് മുൻപ് മൊറാട്ടയെ വിട്ടുനൽകുന്നതിന് ഗലാറ്റസറേ നഷ്ടപരിഹാരം ആവശ്യപ്പെട്ടേക്കാമെന്നും സൂചനയുണ്ട്.
ഗലാറ്റസറേയുടെ അനുമതിക്കായി കാത്തിരിക്കുകയാണ് കോമോ ക്ലബ്ബ്. മൊറാട്ടയ്ക്ക് സീരി എയിലേക്ക് മടങ്ങിയെത്താൻ താൽപ്പര്യമുണ്ടെന്നും, കോമോ മാനേജരായ മുൻ ചെൽസി സഹതാരം സെസ്ക് ഫാബ്രിഗാസ് ഈ നീക്കത്തിൽ പ്രധാന പങ്ക് വഹിച്ചതായും റിപ്പോർട്ടുകൾ പറയുന്നു.
