കേരള ബ്ലാസ്റ്റേഴ്സ് ഈ സീസൺ അവസാനിക്കും മുമ്പ് തന്നെ അടുത്ത സീസണായി ഒരുങ്ങി തുടങ്ങുകയാണ്. ഒരു പുതിയ സൈനിംഗ് കൂടെ കേരള ബ്ലാസ്റ്റേഴ്സ് അണിയറയിൽ പൂർത്തിയാക്കിയതായാണ് വിവരങ്ങൾ. ഇന്ത്യം യുവതാരങ്ങളിൽ ഏറെ പ്രതീക്ഷ നൽകുന്ന സ്ട്രൈക്കർ വിക്രം പ്രതാപ് സിംഗുമായി കേരള ബ്ലാസ്റ്റേഴ്സ് കരാർ ഒപ്പുവെച്ചതായാണ് വിവരങ്ങൾ. സൈനിംഗ് ഈ സീസൺ അവസാനം കേരള ബ്ലാസ്റ്റേഴ്സ് ഔദ്യോഗികമായി പ്രഖ്യാപിക്കും.
നാലു വർഷത്തെ നീണ്ട കരാറിൽ ആകും വിക്രം പ്രതാപ് സിംഗിനെ ബ്ലാസ്റ്റേഴ്സ് സ്വന്തമാക്കുന്നത്. വരുന്ന സീസണിൽ വിക്രമിനെ ഇന്ത്യൻ ആരോസിന് തന്നെ ലോണിൽ നൽകുന്നതിനെ കുറിച്ചും ബ്ലാസ്റ്റേഴ്സ് ചിന്തിക്കുന്നുണ്ട്. ഇപ്പോൾ ഇന്ത്യൻ ആരോസിന്റെ ക്യാപ്റ്റനാണ് വിക്രം. ഇന്ത്യൻ യുവ ടീമുകളുടെയും നായകനായി കളിച്ചിട്ടുണ്ട് വിക്രം. ചണ്ഡീഗഢ് ഫുട്ബോൾ അക്കാദമിയിലൂടെ വളർന്ന താരമാണ്. മിനേർവ പഞ്ചാബിന്റെയും ഭാഗമയിട്ടുണ്ട് ഈ യുവ പ്രതീക്ഷ. ഈ സീസണിൽ ഇതുവരെ ആരോസിനു വേണ്ടി നാലു ഗോളുകൾ വിക്രം നേടിയിട്ടുണ്ട്.
