ഇന്നലെ നടന്ന റയൽ മാഡ്രിഡ്, വിയ്യറയൽ മത്സരശേഷം വിയ്യറയൽ താരം അലക്‌സ് ബയെനയുടെ മുഖത്ത് അടിച്ചു റയൽ മാഡ്രിഡ് താരം ഫെഡെ വാൽവെർഡേ. മത്സരശേഷം ടീം ബസിനു സമീപം കാത്തിരുന്ന ശേഷം ആണ് ഉറുഗ്വായ് താരം ഫോണിൽ ആയിരുന്ന ബയെനയുടെ മുഖത്ത് അടിച്ചത്. നിലവിൽ പോലീസ് ഈ വിഷയത്തിൽ അന്വേഷണം ആരംഭിച്ചിട്ടുണ്ട്. അവർ വാൽവെർഡേയുടെ ഈ വിഷയത്തിലെ പ്രതികരണവും രേഖപ്പെടുത്തി. തങ്ങളുടെ താരത്തെ തല്ലുന്ന വീഡിയോ വിയ്യറയൽ തെളിവ് ആയി പോലീസിന് കൈമാറും എന്നാണ് സൂചന.
താരത്തിന് എതിരെ ലാ ലീഗയും റയൽ മാഡ്രിഡും എന്ത് നടപടി എടുക്കും എന്നും കണ്ടറിയാം. ജനുവരിയിൽ നടന്ന മത്സരത്തിൽ കളിക്ക് ഇടയിൽ ബയെന വാൽവെർഡേയുടെ കുട്ടിക്ക് എതിരെ പറഞ്ഞ കാര്യം ആണ് വാൽവെർഡേയെ പ്രകോപിപ്പിച്ചത് എന്നാണ് സൂചന. ആ സമയത്ത് കുട്ടി ജനിക്കുമോ എന്നടക്കം ആശങ്കകൾ ഉണ്ടായിരുന്നു വാൽവെർഡേക്കും ഭാര്യക്കും. ആ സമയത്ത് അതീവ മോശമായ അഭിപ്രായം ബയെന വാൽവെർഡേക്ക് നേരെ പറഞ്ഞത് ആണ് ഇന്നത്തെ പ്രതികരണത്തിന് കാരണം എന്നാണ് സൂചന. ഇന്നലത്തെ മത്സരത്തിൽ ഇരു താരങ്ങൾ തമ്മിൽ വാക്കേറ്റത്തിൽ ഏർപ്പെട്ടത് ആയി സൂചനകൾ ഇല്ല.
