ഓസ്ട്രേലിയയ്ക്കെതിരെയുള്ള ടെസ്റ്റ് മത്സരങ്ങള്‍ നീട്ടിയത് ഒരു കണക്കിന് അനുഗ്രഹമാണെന്ന് പറഞ്ഞ് ബംഗ്ലാദേശ് ടെസ്റ്റ് നായകന്‍ മോമിനുള്‍ ഹക്ക്. ഇപ്പോള്‍ വിലക്ക് നേരിടുന്ന ഷാക്കിബുള്‍ ഹസന്‍ ഇനി പരമ്പര നടക്കുന്ന സമയത്ത് ടീമിലേക്ക് തിരികെ എത്തുമെന്നതും മുഴുവന്‍ ശക്തിയുള്ള ടീമിനെ പരമ്പരയ്ക്ക് ഉപയോഗിക്കാനാകുമെന്ന് മോമിനുള്‍ ആശ്വാസപ്പെട്ടു.
ജൂണ്‍ 2020ല്‍ നടക്കേണ്ട ബംഗ്ലാദേശ് – ഓസ്ട്രേലിയ പരമ്പര കൊറോണ വ്യാപനത്തെത്തുടര്‍ന്ന് തല്‍ക്കാലം ഉപേക്ഷിക്കുവാന്‍ തീരുമാനിക്കുകയായിരുന്നു ഇരു ബോര്‍ഡുകളും. പരമ്പര അടുത്ത വര്‍ഷത്തേക്ക് നീട്ടുകയാണെങ്കില്‍ ഐസിസിയുടെ ഒരു വര്‍ഷത്തെ വിലക്ക് നേരിടുന്ന ഷാക്കിബ് തിരികെ എത്തുവാനുള്ള സാധ്യതയുണ്ട്. 2020 ഒക്ടോബര്‍ 29നാണ് ഷാക്കിബിന്റെ വിലക്ക് അവസാനിക്കുന്നത്.
ടെസ്റ്റ് പരമ്പര നീട്ടി വെച്ചതില്‍ തനിക്ക് ഒരു വിഷമവുമില്ലെന്നാണ് മോമിനുള്‍ ഹക്ക് വ്യക്തമാക്കിയത്. ഷാക്കിബിന്റെ ടീമിലേക്ക് മടങ്ങി വരവ് ടീമിനെ സ്വാഭാവികമായി തന്നെ ശക്തിപ്പെടുത്തുവെന്നും മോമിനുള്‍ വ്യക്തമാക്കി.
