ബോക്സിംഗിൽ ഇന്ത്യയുടെ സിമ്രന്‍ജിത്ത് കൗര്‍ പ്രീക്വാര്‍ട്ടറിൽ പുറത്ത്. വനിതകളുടെ ലൈറ്റ് വെയിറ്റ് വിഭാഗത്തിൽ(57-60) ഇന്ന് തായ്‍ലാന്‍ഡിന്റെ സുദാപോൺ സീസോണ്ടിയെയാണ് സിമ്രന്‍ജിത്ത് കൗര്‍ നേരിട്ടത്. ആദ്യ റൗണ്ടിൽ ബൈ ലഭിച്ചാണ് സിമ്രന്‍ജിത്ത് ഈ റൗണ്ടിലേക്ക് എത്തിയത്. ഏകപക്ഷീയമായ നിലയിൽ 5-0 എന്ന നിലയിലായിരുന്നു തായ്‍ലാന്‍ഡ് താരത്തിന്റെ വിജയം.
ആദ്യ റൗണ്ടിൽ സിമ്രന്‍ജിത്ത് കൗറാണ് മികച്ച പ്രകടനം കാഴ്ചവെച്ചതെന്ന് തോന്നിയെങ്കിലും ജഡ്ജിമാര്‍ അഞ്ച് പേരും തായ്‍ലാന്‍ഡ് താരത്തിനൊപ്പം നിന്നു. രണ്ടാം റൗണ്ടിൽ തായ്‍ലാന്‍ഡ് താരം ആയിരുന്നു വ്യക്തമായ മികവ് പുലര്‍ത്തിയത്. മൂന്നാം റൗണ്ടിലും മേല്‍ക്കൈ സിമ്രന്‍ജിത്തിന് മേല്‍ തായ്‍ലാന്‍ഡ് താരം നേടിയപ്പോള്‍ ഇന്ത്യന്‍ പ്രതീക്ഷകള്‍ അസ്തമിച്ചു.
