ലോര്‍ഡ്സില്‍ നിന്നുള്ള ദി ഹണ്ട്രെഡ് ടൂര്‍ണ്ണമെന്റിലെ ഫ്രാഞ്ചൈസിയെ ഓസ്ട്രേലിയന്‍ ഇതിഹാസ താരം ഷെയിന്‍ വോണ്‍ പരിശീലിപ്പിക്കും. ടീമിന്റെ മുഖ്യ കോച്ചായാവും വോണ്‍ എത്തുന്നത്. ഐപിഎലിന്റെ ഉദ്ഘാടന സീസണില്‍ രാജസ്ഥാന്‍ റോയല്‍സിന്റെ കളിക്കാരനും കോച്ചുമായി പ്രവര്‍ത്തിച്ച് കിരീടത്തിലേക്ക് നയിച്ചിരുന്നു ഷെയിന്‍ വോണ്‍. ടൂര്‍ണ്ണമെന്റില്‍ മാഞ്ചെസ്റ്ററിനെ സൈമണ്‍ കാറ്റിച്ചും ബ്രിമിംഗത്തിനെ ആന്‍ഡ്രൂ മക്ഡോണാള്‍ഡും പരിശീലിപ്പിക്കുമെന്നാണ് അറിയുവാന്‍ കഴിയുന്നത്.
ഐപിഎല്‍ പോലെ തന്നെ ശ്രദ്ധേയമാകുവാന്‍ പോകുന്ന ഒരു ടൂര്‍ണ്ണമെന്റാകും ദി ഹണ്ട്രെഡ് എന്നാണ് തന്റെ തോന്നലെന്ന് വോണ്‍ വ്യക്തമാക്കി. തന്നെ ടീമിന്റെ മുഖ്യ കോച്ചായി നിയമിച്ചത് അഭിമാനവും വളരെ ബഹുമതിയും നല്‍കുന്ന കാര്യമാണെന്നും വോണ്‍ പറഞ്ഞു. പുതിയ ടൂര്‍ണ്ണമെന്റിന്റെ കോച്ചായി എത്തുവാനാകുന്നത് തന്നെ വലിയ കാര്യമാണെന്നും ഷെയിന്‍ വോണ്‍ വ്യക്തമാക്കി.
