ലിവർപൂൾ താരം സാദിയോ മാനെയുടെ മികച്ച പ്രകടനത്തിന്റെ പിൻബലത്തിൽ ആഫ്രിക്ക കപ്പ് ഓഫ് നേഷൻസ് ഫൈനൽ ഉറപ്പിച്ച് സെനഗൽ. സെമി ഫൈനൽ പോരാട്ടത്തിൽ ബുർകിന ഫാസോയെ ഒന്നിനെതിരെ മൂന്ന് ഗോളുകൾക്ക് തോൽപ്പിച്ചാണ് സെനഗൽ ഫയൽ ഉറപ്പിച്ചത്. ഇന്ന് നടക്കുന്ന കാമറൂൺ – ഈജിപ്ത് മത്സരത്തിലെ വിജയികളാവും ഫൈനലിൽ സെനഗലിന്റെ എതിരാളികൾ.
ഗോൾ രഹിതമായ ആദ്യ പകുതിയിൽ സെനഗലിന് അനുകൂലമായി റഫറി രണ്ട് തവണ പെനാൽറ്റി വിളിച്ചെങ്കിലും ‘വാർ’ ഇടപെട്ട് അത് തടഞ്ഞത് ബുർകിന ഫാസോക്ക് തുണയായി. എന്നാൽ രണ്ടാം പകുതിയിൽ അബ്ഡൊ ഡിയാലോയുടെ ഗോളിൽ മുൻപിലെത്തിയ സെനഗൽ അധികം വൈകാതെ ഇദ്രിസ് ഗുയെ ഗോളിൽ ലീഡ് ഇരട്ടിയാകുകയും ചെയ്തു. എന്നാൽ ബ്ലാടി ടൂറെയിലൂടെ ഒരു ഗോൾ മടക്കി ബുർകിന ഫാസോ മത്സരത്തിലേക്ക് തിരിച്ച് വരാൻ ശ്രമം നടത്തിയെങ്കിലും മത്സരത്തിന്റെ 87ആം മിനുട്ടിൽ മൂന്നാമത്തെ ഗോളും നേടി മാനെ സെനഗലിന്റെ വിജയം ഉറപ്പിക്കുകയായിരുന്നു.
