ലോക ഒന്നാം നമ്പർ താരം അരിന സബലങ്ക ഓസ്ട്രേലിയൻ ഓപ്പൺ വനിതാ സിംഗിൾസ് ഫൈനലിൽ പ്രവേശിച്ചു. വ്യാഴാഴ്ച മെൽബണിലെ റോഡ് ലാവർ അരീനയിൽ നടന്ന ആവേശകരമായ സെമിഫൈനലിൽ ഉക്രെയ്ൻ താരം എലിന സ്വിറ്റോലീനയെ നേരിട്ടുള്ള സെറ്റുകൾക്കാണ് സബലങ്ക പരാജയപ്പെടുത്തിയത്. സ്കോർ: 6-2, 6-3.
ഇതോടെ തുടർച്ചയായ നാലാം വർഷമാണ് സബലങ്ക ഓസ്ട്രേലിയൻ ഓപ്പൺ ഫൈനലിലെത്തുന്നത്. ഉക്രെയ്ൻ താരമെന്ന നിലയിൽ ചരിത്രപരമായ നേട്ടത്തിനരികെയായിരുന്ന സ്വിറ്റോലീനയുടെ പോരാട്ടം ഇതോടെ അവസാനിച്ചു.
മത്സരത്തിലുടനീളം സബലങ്കയുടെ കരുത്തുറ്റ പ്രകടനമാണ് കാണാൻ കഴിഞ്ഞത്. ആദ്യ സെറ്റ് വെറും 41 മിനിറ്റുകൊണ്ട് സബലങ്ക സ്വന്തമാക്കി. രണ്ടാം സെറ്റിൽ തുടക്കത്തിൽ 0-2 എന്ന നിലയിൽ പിന്നിലായെങ്കിലും, തകർപ്പൻ തിരിച്ചുവരവിലൂടെ തുടർച്ചയായി അഞ്ച് ഗെയിമുകൾ നേടി സബലങ്ക മത്സരം തന്റെ വരുതിയിലാക്കി.
ശനിയാഴ്ച നടക്കുന്ന ഫൈനലിൽ എലീന റൈബാക്കിനയോ ജെസീക്ക പെഗുലയോ ആയിരിക്കും സബലങ്കയുടെ എതിരാളി.
