ക്രിസ്റ്റ്യാനോ റൊണാൾഡോയുടെ സൗദിയിലെ ആദ്യ സീസണിൽ അൽ നസർ കിരീടങ്ങളിൽ നിന്ന് അകലുകയാണ്. ഇന്ന് കിംഗ്സ് കപ്പ് സെമി ഫൈനലിൽ അൽ നസർ അൽ വെഹ്ദയോട് തോറ്റ് ആണ് പുറത്തായത്. മറുപടിയില്ലാത്ത ഒരു ഗോളിനായിരുന്നു വെഹ്ദയുടെ വിജയം. 40 മിനുട്ടുകളോളം വെഹ്ദ 10 പേരുമായാായിരുന്നു കളിച്ചത്. എന്നിട്ടും അൽ നസറിന് ഒരു ഗോൾ അടിക്കാൻ ആയില്ല.
ഇന്ന് ആദ്യ പകുതിയിൽ 23ആം മിനുട്ടിൽ ബീഗുളിലൂടെയാണ് വെഹ്ദ ലീഡ് നേടിയത്. റൊണാൾഡോക്കും സംഘത്തിനും ഈ ഗോളിന് മറുപടി നൽകാൻ ആയില്ല. രണ്ടാം പകുതിയുടെ തുടക്കത്തിൽ വെഹ്ദയുടെ താരം അൽ ഹഫിതിന് ചുവപ്പ് കാർഡ് ലഭിച്ചു. അൽ നസറിന് എണ്ണത്തിന്റെ അഡ്വാന്റേജ് ലഭിച്ചിട്ടും ഒരു ഗോൾ കണ്ടെത്താൻ പറ്റിയില്ല. കിംഗ്സ് കപ്പിൽ നിന്ന് പുറത്തായതോടെ അൽ നസറിന്റെ ഏക പ്രതീക്ഷ ഇനി സൗദി പ്രൊ ലീഗ് ആണ്. എന്നാൽ അവിടെയും അവർ ഇപ്പോൾ ഒന്നാം സ്ഥാനത്ത് നിന്ന് അകലെയാണ്.
