വലിയ തോല്‍വിയ്ക്ക് ശേഷം ശക്തമായ തിരിച്ചുവരവ് നടത്തി പട്ന പൈറേറ്റ്സ്. ഇന്നലെ നടന്ന രണ്ടാം മത്സരത്തില്‍ പട്ന പൈറേറ്റ്സ് പുനേരി പള്‍ട്ടനെ 17 പോയിന്റ് വ്യത്യാസത്തിലാണ് കീഴ്പ്പെടുത്തിയത്. 53-36 എന്ന സ്കോറിനായിരുന്നു ടീമിന്റെ വിജയം. പാതി സമയത്തും പട്ന തന്നെയാണ് ലീഡ് ചെയ്തതെങ്കിലും 24-19 എന്ന സ്കോറിനു 5 പോയിന്റ് ലീഡ് മാത്രമാണ് കൈവശമുണ്ടായിരുന്നത്. എന്നാല്‍ രണ്ടാം പകുതിയില്‍ പട്ന പൂനെയെ കശക്കിയെറിയുകയായിരുന്നു.
പര്‍ദീപ് നര്‍വാല്‍ നേടിയ 27 പോയിന്റുകളാണ് പട്നയുടെ കൂറ്റന്‍ വിജയത്തിന്റെ അടിത്തറ. പൂനെയ്ക്കായി മോറെ 13 പോയിന്റും സന്ദീപ് നര്‍വാല്‍ 7 പോയിന്റും നേടി. 33 റെയിഡിംഗ് പോയിന്റുകള്‍ പട്ന നേടിയപ്പോള്‍ 28 പോയിന്റുമായി പൂനെ തൊട്ടുപുറകെയെത്തി. 12-6നു പ്രതിരോധത്തിലും മികവ് പട്നയ്ക്കായിരുന്നു. മൂന്ന് തവണ എതിരാളികളെ ഓള്‍ഔട്ട് ആക്കുവാനും പൈറേറ്റ്സിനു സാധിച്ചു.
