പുതിയ സീസണിൽ ഗോൾ വേട്ട ആരംഭിച്ചു വിക്ടർ ഒസിമെൻ. തിരിച്ചു വന്നു ജയം കണ്ടാണ് പുതിയ സീസണിന് ഇറ്റാലിയൻ ചാമ്പ്യന്മാർ തുടക്കം കുറിച്ചത്. പുതുതായി സ്ഥാനക്കയറ്റം നേടി വന്ന ഫ്രോസിനോനെതിരെ ഒന്നിനെതിരെ മൂന്നു ഗോളുകൾക്ക് ആണ് നാപോളി ജയം കണ്ടത്. ഏഴാം മിനിറ്റിൽ കജുസ്റ്റെ വഴങ്ങിയ പെനാൽട്ടി ലക്ഷ്യം കണ്ട ഹരോയി സീരി ബി ജേതാക്കളെ മുന്നിൽ എത്തിച്ചു. എന്നാൽ തുടക്കത്തിലെ ഞെട്ടലിൽ നിന്നു നാപോളി അനായാസം പുറത്ത് വന്നു.
24 മത്തെ മിനിറ്റിൽ സെലിൻസ്കിയുടെ ഷോട്ടിൽ നിന്നു ലഭിച്ച റീബോണ്ടിൽ നിന്നു മറ്റെയോ പൊളിറ്റാനോ നാപോളിക്ക് സമനില ഗോൾ സമ്മാനിച്ചു. 36 മത്തെ മിനിറ്റിൽ റാസ്‌പഡോറി ഗോൾ നേടിയെങ്കിലും അത് ഓഫ് സൈഡ് ആണെന്ന് വാർ കണ്ടെത്തി. 42 മത്തെ മിനിറ്റിൽ ലോറൻസോയുടെ പാസിൽ നിന്നു ഗോൾ കണ്ടത്തിയ ഒസിമെൻ നാപോളിയെ മത്സരത്തിൽ മുന്നിൽ എത്തിച്ചു. രണ്ടാം പകുതിയിൽ 79 മത്തെ മിനിറ്റിൽ ജിയോവാണി ഡി ലോറൻസോയുടെ തന്നെ പാസിൽ നിന്നു തന്റെ രണ്ടാം ഗോൾ നേടിയ ഒസിമെൻ നാപോളി ജയം പൂർത്തിയാക്കി. മത്സരത്തിൽ 19 ഷോട്ടുകൾ ഉതിർത്ത നാപോളി അർഹിച്ച ജയം തന്നെയായി ഇത്.
