ഫിഫ വനിത ലോകകപ്പിൽ നൈജീരിയക്ക് എതിരായ പ്രീ ക്വാർട്ടർ മത്സരത്തിൽ നൈജീരിയൻ താരം മിഷേല അലോസിയെ ചവിട്ടിയതിനു ചുവപ്പ് കാർഡ് കണ്ട ഇംഗ്ലീഷ് മുന്നേറ്റനിര താരം ലോറൻ ജെയിംസിന് 2 മത്സരങ്ങളിൽ നിന്നു വിലക്ക്. നൈജീരിയക്ക് എതിരെ ഗോൾ രഹിത സമനിലക്ക് ശേഷം പെനാൽട്ടി ഷൂട്ട് ഔട്ടിൽ ആണ് ഇംഗ്ലണ്ട് ജയം കണ്ടത്.
സാധാരണ 3 മത്സരങ്ങളിൽ നിന്നു വിലക്ക് ലഭിക്കുമായിരുന്നു എങ്കിലും ഫിഫ അച്ചടക്ക സമിതി 2 മത്സരങ്ങളിൽ മാത്രം താരത്തെ വിലക്കുക ആയിരുന്നു. അങ്ങനെ എങ്കിൽ ഇംഗ്ലണ്ട് ഫൈനലിൽ എത്തിയാൽ താരത്തിന് ഫൈനലിൽ കളിക്കാൻ ആവും. നിലവിൽ ക്വാർട്ടർ ഫൈനലിൽ കൊളംബിയ ആണ് ഇംഗ്ലണ്ടിന്റെ എതിരാളികൾ. ലോകകപ്പിൽ ഗ്രൂപ്പ് ഘട്ടത്തിൽ മിന്നും പ്രകടനം ആണ് 21 കാരിയായ ചെൽസി താരം പുറത്ത് എടുത്തത്. ലോകകപ്പിൽ ഇത് വരെ 3 ഗോളുകൾ താരം നേടിയിട്ടുണ്ട്. ചൈനക്ക് എതിരെ ഇരട്ടഗോൾ നേടിയ താരം മത്സരത്തിൽ 3 അസിസ്റ്റുകൾ ആണ് നൽകിയത്.
