ഐപിഎലില്‍ 3000 റൺസ് നേടുന്ന താരമായി പഞ്ചാബ് കിംഗ്സ് നായകന്‍ കെഎൽ രാഹുല്‍. ചേതന്‍ സക്കറിയയെ ഒരോവറിൽ രണ്ട് സിക്സറുകള്‍ അടുത്തടുത്ത പന്തുകളിൽ നേടിയാണ് ഈ നേട്ടം രാഹുല്‍ നേടിയത്. ഗെയിലിന് പിന്നിലായി ഈ നേട്ടം വേഗത്തിൽ നേടുന്ന രണ്ടാമത്തെ താരമായി ഇതോടെ രാഹുല്‍ മാറി. പഞ്ചാബ് ഇന്നിംഗ്സിന്റെ രണ്ടാം ഓവറിൽ സ്കോര്‍ 2 റൺസിൽ നില്‍ക്കുമ്പോള്‍ രാഹുലിന്റെ ക്യാച്ച് ചേതന്‍ സക്കറിയയുടെ ഓവറിൽ എവിന്‍ ലൂയിസ് കൈവിട്ടിരുന്നു.
75 ഇന്നിംഗ്സിൽ നിന്നാണ് ഗെയിൽ ഈ നേട്ടം നേടിയതെങ്കിൽ രാഹുല്‍ 80 ഇന്നിംഗ്സിൽ നിന്ന് ഈ നേട്ടം സ്വന്തമാക്കി. ഡേവിഡ് വാര്‍ണര്‍(94), സുരേഷ് റെയ്‍ന(103), എബി ഡി വില്ലിയേഴ്സ്(104), അജിങ്ക്യ രഹാനെ(104) എന്നിവരാണ് മൂവായിരം റൺസിലേക്ക് വേഗത്തിലെത്തിയ മറ്റു താരങ്ങള്‍.
