സീരി എയിൽ യുവന്റസിന് ഗംഭീര വിജയം. ഇന്ന് നടന്ന പോരാട്ടത്തിൽ ജിനോയയെ നേരിട്ട യുവന്റസ് ഒന്നിനെതിരെ മൂന്നു ഗോളുകൾക്കാണ് വിജയിച്ചത്. നേടിയ മൂന്ന് ഗോളുകളും ഒന്നിനൊന്ന് മെച്ചമാണ് എന്നതായിരുന്നു ഇന്നത്തെ യുവന്റസ് വിജയത്തിലെ പ്രത്യേകത. ആദ്യ പകുതിയിൽ ഒരുപാട് അവസരങ്ങൾ യുവന്റസ് സൃഷ്ടിച്ചു എങ്കിലും ഗോൾ നേടാൻ അവർക്കായില്ല. രണ്ടാം പകുതിയിൽ ഡിബാല ആണ് ആദ്യ ഗോൾ നേടിയത്.
പെനാൾട്ടി ബോക്സിൽ ജിനോവ ഡിഫൻസിന് മുന്നിൽ പന്തുമായി നൃത്തം വെച്ച ശേഷമായിരുന്നു ഡിബാലയുടെ ഫിനിഷ്. ഡിബാലയുടെ ഗോളിന് തൊട്ടു പിന്നാലെ ആയിരുന്നു റൊണാൾഡോ ഗോൾ. ബോക്സിന് പുറത്ത് നിന്ന് റൊണാൾഡോ തൊടുത്ത ഷോട്ട് ബുള്ളറ്റ് കണക്കെയാണ് ഗോൾ വലയിൽ എത്തിയത്. 73ആം മിനുട്ടിൽ കളിയിലെ ഏറ്റവും മികച്ച ഗോളിലൂടെ ഡഗ്ലസ് കോസ്റ്റ യുവന്റസിന്റെ ലീഡ് മൂന്നാക്കി ഉയർത്തുകയും ചെയ്തു.
ഈ വിജയത്തോടെ യുവന്റസിന് 72 പോയന്റായി. രണ്ടാമതുള്ള ലാസിയോയേക്കാൾ 4 പോയന്റിന്റെ ലീഡ് ഇപ്പോഴും യുവന്റസിനുണ്ട്.
