അയാക്സിന്റെ ക്യാപ്റ്റനായ ഡി ലിറ്റ് യുവന്റസിലേക്ക് അടുക്കുന്നു. താരവും യുവന്റസുമായി കരാർ ധാരണയായതായി ഇറ്റാലിയ മാധ്യമമായ സ്കൈ ഇറ്റാലിയ റിപ്പോർട്ട് ചെയ്യുന്നു. നീണ്ട കാലത്തെ ചർച്ചകൾക്ക് ശേഷമാണ് ഡി ലിറ്റ് യുവന്റസിലേക്ക് പോകാൻ ഒരുങ്ങുന്നത്‌. ബാഴ്സലോണ ആയിരുന്നു ഇതുവരെ താരത്തിനായി മുന്നിൽ ഉണ്ടായിരുന്നത്.
കളിക്കാൻ അവസരം കിട്ടും എന്ന് ഉറപ്പില്ലാത്തതിനാൽ ആണ് ബാഴ്സലോണയുടെ ഓഫർ ഡി ലിറ്റ് നിരസിച്ചത്. ബാഴ്സലോണ പിറകിലായതോടെ ചർച്ച സജീവമാക്കിയ യുവന്റസ് താരത്തിന്റെ ആവശ്യങ്ങൾ അംഗീകരിക്കുകയായിരുന്നു. നേരത്തെ ക്രിസ്റ്റ്യാനോ റൊണാൾഡോയും ഡിലിറ്റിനെ യുവന്റസിലേക്ക് ക്ഷണിച്ചിരുന്നു. അന്ന് ക്ഷണം നിരസിച്ചു എങ്കിലും അവസാനം യുവന്റസിലേക്ക് തന്നെ എത്തുകയാണ് ഡി ലിറ്റ്.
19കാരൻ മാത്രമായ ഡി ലിറ്റ് അവസാന സീസണിൽ ചാമ്പ്യൻസ് ലീഗിൽ ഉൾപ്പെടെ വൻ പ്രകടനമായിരുന്നു നടത്തിയത്. കഴിഞ്ഞ സീസണിൽ യുവന്റസിനെ ചാമ്പ്യൻസ് ലീഗിൽ നിന്ന് പുറത്താക്കിയതിലും ഡി ലിറ്റിന് വലിയ പങ്കുണ്ടായിരുന്നു.
