തോൽ‌വിയിൽ നിന്ന് കരകയറാൻ ഡൽഹി ഡൈനാമോസ് ഇന്ന് ചെന്നൈയിനെ നേരിടും

പോയിന്റ് ടേബിളിൽ അവസാന സ്ഥാനത്തുള്ള ഡൽഹി ഡൈനാമോസ് ഇന്ന് ഒന്നാം സ്ഥാനം ലക്‌ഷ്യം വെച്ചിറങ്ങുന്ന ചെന്നൈയിൻ എഫ്.സിയെ നേരിടും. ചെന്നൈയിൽ ജവഹർലാൽ നെഹ്‌റു സ്റ്റേഡിയത്തിൽ വെച്ചാണ് മത്സരം. 8 മത്സരങ്ങളിൽ നിന്ന് 5 ജയവും 1 സമനിലയും 2 തോൽവിയുമായി 16 പോയിന്റോടെ രണ്ടാം സ്ഥാനത്താണ് ചെന്നൈയിൻ.  ഡൽഹി ഡയനാമോസ് ആവട്ടെ 7 മത്സരം കളിച്ചത്തിൽ 6 മത്സരവും തോറ്റാണ് വരുന്നത്. ഒരു മത്സരം ജയിച്ച അവർ പോയിന്റ് പട്ടികയിൽ അവസാന സ്ഥാനത്താണ്.

റഫറിക്കെതിരെ മോശം പരാമർശം നടത്തിയതിന്റെ പേരിൽ 3 മത്സരത്തിൽ വിലക്ക് നേരിടുന്ന ജോൺ ഗ്രിഗറിയുടെ സേവനം ചെന്നൈയിന് ഇന്ന് നഷ്ടമാകും. ഗ്രിഗറിയുടെ അഭാവത്തിൽ അസിസ്റ്റന്റ് കോച്ച് സയിദ് സാബിർ പാഷ ആവും ടീമിനെ ഇറക്കുക. ഹെൻറിക് സെറെനോയും മൈൽസൺ അൽവസും ചേർന്നുള്ള പ്രതിരോധവും ജെജെയും റാഫേൽ അഗസ്റ്റോയുമുള്ള ആക്രമണ നിരയും മികച്ച ഫോമിലാണ്.

ലീഗിൽ ഏറ്റവും കൂടുതൽ ഗോൾ വഴങ്ങിയ പ്രതിരോധം തന്നെയാവും ഡൽഹിയുടെ പ്രധാന പ്രശ്നം. ലീഗിലെ ആദ്യ മത്സരം ജയിച്ചു തുടങ്ങിയ ഡൽഹി തുടർന്നുള്ള എല്ലാ മത്സരങ്ങളും പരാജയപെടുകയായിരുന്നു. പ്രതിരോധനിര വരുത്തുന്ന വ്യക്തിപരമായ തെറ്റുകളാണ് ഡൽഹിക്ക് വിനയാകുന്നതെന്ന് കോച്ച് മിഗേൽ പോർച്ചുഗൽ കഴിഞ്ഞ ദിവസം പറഞ്ഞിരുന്നു.

കൂടുതൽ കായിക വാർത്തകൾക്ക് : www.facebook.com/FanportOfficial