കോമൺവെൽത്ത് ഗെയിംസിൽ വനിത ഹോക്കിയിൽ അതുഗ്രൻ പ്രകടനം കാഴ്ച വച്ചെങ്കിലും സെമിയിൽ ഓസ്‌ട്രേലിയയോട് കീഴടങ്ങി ഇന്ത്യൻ വനിതകൾ. അതിശക്തരായ ഓസ്‌ട്രേലിയയെ വിറപ്പിച്ചു ആണ് ഇന്ത്യൻ വനിതകൾ കീഴടങ്ങിയത്. മത്സരത്തിൽ പത്താം മിനിറ്റിൽ ഓസ്‌ട്രേലിയ ആണ് മത്സരത്തിൽ മുന്നിൽ എത്തിയത്. റെബേക്ക ഗ്രയിനിയർ ആണ് അവർക്ക് ഗോൾ സമ്മാനിച്ചത്. തുടർന്ന് നിരവധി പെനാൽട്ടി കോർണറുകളും അവസരങ്ങളും സൃഷ്ടിക്കുന്ന ഇന്ത്യൻ ടീമിനെയാണ് മത്സരത്തിൽ കാണാൻ ആയത്. അതിന്റെ ഫലമായി 49 മത്തെ മിനിറ്റിൽ ഇന്ത്യ മത്സരത്തിൽ ഒപ്പമെത്തി.
വന്ദന കതരിയ ആയിരുന്നു ഇന്ത്യക്ക് ആയി സമനില ഗോൾ സമ്മാനിച്ചത്. ഓസ്‌ട്രേലിയ ടൂർണമെന്റിൽ വഴങ്ങുന്ന ആദ്യ ഗോൾ ആയിരുന്നു ഇത്. മുഴുവൻ സമയത്തും തുടർന്ന് ഇരു ടീമുകൾക്കും വിജയഗോൾ നേടാൻ സാധിക്കാതെ വന്നപ്പോൾ മത്സരം പെനാൽട്ടി ഷൂട്ട് ഔട്ടിലേക്ക് നീണ്ടു. എന്നാൽ പെനാൽട്ടി സ്ട്രോക്കുകൾ ഇന്ത്യൻ താരങ്ങൾക്ക് ലക്ഷ്യം കാണാതെ വന്നപ്പോൾ ഓസ്‌ട്രേലിയ ഷൂട്ട് ഔട്ടിൽ 3-0 നു ജയം സ്വന്തമാക്കി. വെങ്കല മെഡലിനായുള്ള പോരാട്ടത്തിൽ ഇന്ത്യൻ വനിതകൾ ന്യൂസിലാന്റിനെ നേരിടും. തീർത്തും അഭിമാനകരമായ പ്രകടനം തന്നെയാണ് ഇന്ത്യൻ വനിതകളിൽ നിന്നു ഇന്ന് ഉണ്ടായത്.
