ഐപിഎല്‍ 2019 ഉദ്ഘാടന മത്സരത്തില്‍ നിലവിലെ ചാമ്പ്യന്മാരായ ചെന്നൈ സൂപ്പര്‍ കിംഗ്സും റോയല്‍ ചലഞ്ചേഴ്സ് ബാംഗ്ലൂരും എറ്റുമുട്ടും. മാര്‍ച്ച് 23നു ചെന്നൈയിലാണ് മത്സരം. ആദ്യ രണ്ടാഴ്ചത്തെ മത്സരങ്ങളുടെ ഫിക്സ്ച്ചറുകള്‍ മാത്രമാണ് പ്രഖ്യാപിച്ചിരിക്കുന്നത്. ലോകസഭ 2019 തിരഞ്ഞെടുപ്പ് തീയ്യതി പ്രഖ്യാപനം മുന്‍ നിര്‍ത്തിയാണ് രണ്ടാഴ്ചത്തെ മത്സരക്രമം മാത്രം പുറത്ത് വിട്ടത്.
തിരഞ്ഞെടുപ്പ് തീയ്യതി വന്ന ശേഷം ആവശ്യമെങ്കില്‍ ഈ ഫിക്സ്ച്ചറുകള്‍ക്ക് മാറ്റം വരുത്തുവാനും ഐപിഎല്‍ ഗവേണിംഗ് കൗണ്‍സില്‍ അംഗങ്ങള്‍ ആലോചിക്കുന്നുണ്ടെന്നാണ് അറിയുന്നത്. മാര്‍ച്ച് 23 മുതല്‍ ഏപ്രില്‍ 5 വരെ 17 മത്സരങ്ങളാണ് നടക്കുക. മാര്‍ച്ച് 24, 30, 31 എന്നീ തീയ്യതികളില്‍ രണ്ട് മത്സരങ്ങളുണ്ടാകും.
