അയര്‍ലണ്ടിനെതിരെ മൂന്നാം ഏകദിനത്തിൽ പത്ത് വിക്കറ്റ് വിജയവുമായി ബംഗ്ലാദേശ്. ടീമിന്റെ ഏകദിന ചരിത്രത്തിലെ തന്നെ ആദ്യത്തെ പത്ത് വിക്കറ്റ് വിജയം ആണിത്. ആദ്യം ബാറ്റ് ചെയ്ത അയര്‍ലണ്ട് 28.1 ഓവറിൽ 101 റൺസിന് ഓള്‍ഔട്ട് ആയപ്പോള്‍ ബംഗ്ലാദേശ് 13.1 ഓവറിൽ 102 റൺസ് നേടി പത്ത് വിക്കറ്റ് വിജയം കരസ്ഥമാക്കി.
36 റൺസ് നേടിയ കര്‍ടിസ് കാംഫറും 28 റൺസ് നേടിയ ലോര്‍ക്കന്‍ ടക്കറും നടത്തിയ ചെറുത്ത്നില്പില്ലായിരുന്നുവെങ്കിൽ അയര്‍ലണ്ടിന്റെ സ്ഥിതി കൂടുതൽ പരിതാപകരമാകുമായിരുന്നു.
ബംഗ്ലാദേശിനായി ഹസന്‍ മഹമ്മുദ് അഞ്ച് വിക്കറ്റും ടാസ്കിന്‍ അഹമ്മദ് മൂന്നും വിക്കറ്റ് നേടിയപ്പോള്‍ രണ്ട് വിക്കറ്റ് എബോദത്ത് ഹൊസൈന്‍ സ്വന്തമാക്കി.
ബാറ്റിംഗിനിറങ്ങിയ ബംഗ്ലാദേശിനായി ലിറ്റൺ ദാസ് 38 പന്തിൽ 50 റൺസ് നേടിയപ്പോള്‍ തമീം ഇക്ബാൽ 41 റൺസുമായി പുറത്താകാതെ നിന്നു.
