പാക്കിസ്ഥാന്‍ ക്രിക്കറ്റ് ഇന്ന് ഏറ്റവും അധികം പ്രതീക്ഷ വെച്ച് പുലര്‍ത്തുന്ന താരമാണ് ബാബര്‍ അസം. അദ്ദേഹത്തെ വിരാട് കോഹ്‍ലിയുമായാണ് പല ക്രിക്കറ്റ് പണ്ഡിതന്മാരും വാഴ്ത്തുന്നത്. തന്റെ കരിയറിന്റെ തുടക്കത്തിലുള്ള താരം കോഹ്‍ലിയുടെ നിലവാരത്തിലേക്ക് ഉയരുവാന്‍ ഇനിയും ഏറെ മുന്നോട്ട് നടക്കേണ്ടതുണ്ടെങ്കിലും ഭാവി താരമായി വാഴ്ത്തപ്പെടേണ്ടയാള് തന്നെയാണ് ബാബര്‍ അസം എന്നതില്‍ സംശയമില്ല.
അടുത്തിടെയാണ് ടി20 ക്യാപ്റ്റനായ താരത്തെ പാക്കിസ്ഥാന്റെ ഏകദിന ടീമിന്റെ ക്യാപ്റ്റന്‍ കൂടിയായി നിയമിച്ചത്. ഇപ്പോള്‍ ടീം കോച്ചും മുഖ്യ സെലക്ടറുമായ മിസ്ബ ഉള്‍ ഹക്കും താരത്തിനെ പുകഴ്ത്തി എത്തിയിരിക്കുകയാണ്.
ബാബര്‍ വിരാട് കോഹ്‍ലിയുടെയും സ്റ്റീവ് സ്മിത്തിന്റെയും അതേ നിലവാരത്തിലേക്ക് എത്തുവാന്‍ വളരെ അടുത്ത് കഴിഞ്ഞുവെന്നാണ് മിസ്ബ വ്യക്തമാക്കിയത്. ഐസിസിയുടെ ടി20 റാങ്കിംഗ് പ്രകാരം നിലവില്‍ ഒന്നാം സ്ഥാനത്താണ് ബാബര്‍ അസം.
ഇന്ന് ലോക ക്രിക്കറ്റില്‍ ഏത് ഫോര്‍മാറ്റിലായാലും മികച്ചവരെന്ന് വാഴ്ത്തപ്പെടുന്ന താരങ്ങളാണ് വിരാട് കോഹ്‍ലിയും സ്റ്റീവ് സ്മിത്തും. അവര്‍ക്കൊപ്പം അധികം വൈകാതെ ബാബര്‍ അസം എത്തുമെന്നും മിസ്ബ വെളിപ്പെടുത്തി.
ഇത്തരം താരതമ്യങ്ങളില്‍ തനിക്ക് താല്പര്യമില്ലെങ്കിലും ബാബര്‍ അസം ഉടന്‍ തന്നെ ലോകോത്തര ബാറ്റ്സ്മാനായി വാഴ്ത്തപ്പെടുമെന്നും ബാബര്‍ അസം വ്യക്തമാക്കി. കോഹ്‍ലിയുടെയും സ്മിത്തിന്റെയും പോലെയുള്ള വര്‍ക്ക് എത്തിക്സ് ആണ് താരത്തിന്റെയെന്നും പ്രതിഭയിലും അവര്‍ക്കൊപ്പം നില്‍ക്കുന്ന താരമാണ് ബാബറെന്നും മിസ്ബ ഉള്‍ ഹക്ക് അഭിപ്രായപ്പെട്ടു.
