ചരിത്രത്തിലെ ഏറ്റവും ഉയർന്ന തുക ഒരു ബ്രിട്ടീഷ് താരത്തിന് ആയി മുന്നോട്ട് വച്ചു ആഴ്‌സണൽ. 105 മില്യൺ പൗണ്ട് ആണ് തങ്ങളുടെ മൂന്നാം ഓഫറിൽ ആഴ്‌സണൽ വെസ്റ്റ് ഹാമിനു മുന്നിൽ അവരുടെ ക്യാപ്റ്റൻ ഡക്ലൻ റൈസിന് ആയി വച്ചത്. 100 മില്യൺ കൂടെ 5 മില്യൺ ആഡ് ഓൺ ആണ് ആഴ്‌സണലിന്റെ ഓഫർ. നേരത്തെ ആഴ്‌സണലിന്റെ രണ്ടു ഓഫറുകളും മാഞ്ചസ്റ്റർ സിറ്റിയുടെ ഒരു ഓഫറും വെസ്റ്റ് ഹാം തള്ളിയിരുന്നു.
നിലവിൽ ആഴ്‌സണലിന്റെ റെക്കോർഡ് ഓഫറിലും വെസ്റ്റ് ഹാം പൂർണ തൃപ്തർ അല്ല എന്നാണ് റിപ്പോർട്ട്. ആഴ്‌സണൽ മുന്നോട്ട് വെച്ച ചെറിയ നിബന്ധനകളിൽ അവർക്ക് വിയോജിപ്പ് ഉണ്ടെങ്കിലും ഓഫറിലെ ചെറിയ മാറ്റങ്ങൾ വരുത്തിയാൽ തങ്ങൾക്ക് താരത്തെ സ്വന്തമാക്കാൻ ആവും എന്ന പ്രതീക്ഷയിൽ ആണ് ആഴ്‌സണൽ. അതേസമയം വെസ്റ്റ് ഹാം മാഞ്ചസ്റ്റർ സിറ്റിയുടെ ഒരു ഓഫറിന് കൂടെ കാത്തിരുന്നേക്കും എന്നും റിപ്പോർട്ടുകൾ ഉണ്ട്. എന്നാൽ സിറ്റി ഇനിയും താരത്തിന് ആയി രംഗത്ത് വരുമോ എന്ന കാര്യം വ്യക്തമല്ല.
താരത്തിന് ആയി വലിയ രീതിയിൽ ചരട് വലിച്ച ആഴ്‌സണൽ പരിശീലകൻ മിഖേൽ ആർട്ടെറ്റ താരത്തെ സ്വന്തമാക്കാൻ ഉറച്ച് തന്നെയാണ്. നേരത്തെ റൈസിനെ ടീമിൽ വരാൻ പ്രേരിപ്പിച്ച ആർട്ടെറ്റയുടെ ആവശ്യത്തിന് പുറത്ത് ആണ് ആഴ്‌സണൽ വലിയ ഓഫർ മുന്നോട്ട് വച്ചത്. ഓഫറിൽ നിലവിൽ ചെറിയ കാര്യങ്ങൾക്ക് പരിഹാരം ഉണ്ടാക്കാൻ ഇരു ടീമുകൾക്കും ആയാൽ താരം ആഴ്‌സണലിൽ എത്തും.
