2019 ISSF ലോകകപ്പില്‍ സ്വര്‍ണ്ണവുമായി ഇന്ത്യയുടെ അപൂര്‍വി ചന്ദേല. സ്വര്‍ണ്ണം മാത്രമല്ല പുതിയ ലോക റെക്കോര്‍ഡ് കൂടിയാണ് ഇന്ത്യന്‍ താരം ഇന്ന് സ്വന്തമാക്കിയത്. 10 മീറ്റര്‍ എയര്‍ റൈഫിള്‍ വനിത വിഭാഗം ഫൈനലിലാണ് ഇന്ത്യന്‍ താരത്തിന്റെ സുവര്‍ണ്ണ നേട്ടം. 24 ഷോട്ടുകളില്‍ നിന്ന് 252.9 പോയിന്റുകളുമായാണ് അപൂര്‍വി സ്വര്‍ണ്ണം കരസ്ഥമാക്കിയത്.
മെല്ലെയുള്ള തുടക്കത്തിനു ശേഷം ഇന്ത്യയുടെ 26 വയസ്സുകാരി താരം മെല്ലെ ഒന്നാം സ്ഥാനത്തേക്ക് കയറുകയായിരുന്നു. 16ാം ഷോട്ടില്‍ രണ്ടാം സ്ഥാനത്തേക്ക് 10.8 പോയിന്റ് നേടി എത്തിയ താരം തന്റെ അടുത്ത ഷോട്ടില്‍ ഒന്നാം സ്ഥാനത്തേക്കുയര്‍ന്നു. ആ ഷോട്ടില്‍ 10.6 എന്ന സ്കോര്‍ ആണ് അപൂര്‍വി നേടിയത്.
ചൈനയുടെ സാഹോ റുവോസോ കഴിഞ്ഞ വര്‍ഷം നേടിയ 252.4 എന്ന ലോക റെക്കോര്‍ഡിനെയാണ് അപൂര്‍വി മറികടന്നത്. അപൂര്‍വിയ്ക്ക് പിന്നില്‍ രണ്ടാം സ്ഥാനത്ത് 251.8 പോയിന്റോട് സാഹോ ഇന്നത്തെ മത്സരം വെള്ളിയില്‍ അവസാനിച്ചപ്പോള്‍ വെങ്കലവും ചൈനയുടെ സു ഹോംഗിനായിരുന്നു. 230.4 പോയിന്റോടെയാണ് വെങ്കല മെഡല്‍ ചൈനീസ് താരം നേടിയത്.
