ബോബ് വൂള്‍മറില്‍ നിന്ന് താന്‍ പഠിച്ച കാര്യങ്ങള്‍ പാക്കിസ്ഥാന്‍ ടീമില്‍ നടപ്പിലാക്കുവാന്‍ ശ്രമിക്കുമെന്ന് പറഞ്ഞ് പാക്കിസ്ഥാന്‍ മുന്‍ താരവും നിലവിലെ പാക്കിസ്ഥാന്‍ ബാറ്റിംഗ് കോച്ചുമായ യൂനിസ് ഖാന്‍. വൂള്‍മര്‍ തന്നോട് ഏറെ അടുപ്പമുള്ള ആളായിരുന്നു. വ്യത്യസ്തരായ താരങ്ങളെ വ്യത്യസ്ത സമീപനങ്ങളിലൂടെ കൈകാര്യം ചെയ്ത് കൊണ്ടു പോകുവാനുള്ള മികച്ച കഴിവ് ബോബ് വൂള്‍മര്‍ക്കുണ്ടായിരുന്നു, അത് തനിക്ക് ഏറെ ഇഷ്ടമുള്ളതായിരുന്നു. ആ ഒരു കാര്യമാവും താനും നടപ്പിലാക്കുവാന്‍ ശ്രമിക്കുക എന്ന് യൂനിസ് ഖാന്‍ വ്യക്തമാക്കി.
നെറ്റ്സില്‍ പാക്കിസ്ഥാന്‍ ബാറ്റ്സ്മാന്മാരെ താന്‍ സസൂക്ഷ്മം നിരീക്ഷിക്കുകയാണെന്നും അവരോട് കളിക്കളത്തിലെയും വ്യക്തിപരമായ കാര്യങ്ങളിലും സഹായത്തിന് താനുണ്ടെന്ന് അവര്‍ക്ക് ഉറപ്പ് നല്‍കിയിട്ടുണ്ടെന്നും യൂനിസ് ഖാന്‍ വ്യക്തമാക്കി. താരങ്ങള്‍ യാതൊരു വ്യക്തിപരമായ പ്രശ്നങ്ങളില്ലാതെ ഇരിക്കുന്നതും കൂടുതല്‍ മികവാര്‍ന്ന പ്രകടനം അവരില്‍ നിന്നുണ്ടാകാന്‍ സഹായിക്കുമെന്നും യൂനിസ് ഖാന്‍ വ്യക്തമാക്കി.
