സന്നാഹ മത്സരത്തില്‍ ന്യൂസിലാണ്ടിനെതിരെ ആധികാരിക ജയം സ്വന്തമാക്കി വിന്‍ഡീസ്. ആദ്യം ബാറ്റ് ചെയ്ത വിന്‍ഡീസ് 421 റണ്‍സ് നേടിയപ്പോള്‍ മറുപടി ബാറ്റിംഗിനിറങ്ങിയ ന്യൂസിലാണ്ടിനു നിശ്ചിത 47.2 ഓവറില്‍ ഓള്‍ഔട്ട് ആവുമ്പോള്‍ 330 റണ്‍സ് മാത്രമേ നേടാനായുള്ളു. ടോം ബ്ലണ്ടല്‍ ശതകവും കെയിന്‍ വില്യംസണ്‍ അര്‍ദ്ധ ശതകവും നേടിയെങ്കിലും വിന്‍ഡീസ് നല്‍കിയ റണ്‍ മലയുടെ അടുത്ത് പോലും എത്തുവാന്‍ ന്യൂസിലാണ്ടിനായില്ല.
89 പന്തില്‍ നിന്ന് 8 ഫോറും 5 സിക്സും സഹിതം ബ്ലണ്ടല്‍ 106 റണ്‍സ് നേടിയപ്പോള്‍ വെറും 64 പന്തില്‍ നിന്നാണ് വില്യംസണ്‍ 85 റണ്‍സ് നേടിയത്. എന്നാല്‍ താരം റണ്ണൗട്ട് രൂപത്തില്‍ പുറത്തായത് ന്യൂസിലാണ്ടിനു തിരിച്ചടിയായി. 33/3 എന്ന നിലയിലേക്ക് വീണ ന്യൂസിലാണ്ടിനു മാന്യമായ സ്കോര്‍ നേടുവാന്‍ സഹായിച്ചത് 120 റണ്‍സുമായി ഒത്തുകൂടിയ നാലാം വിക്കറ്റ് കൂട്ടുകെട്ടായിരുന്നു.
ഇവരെ വേര്‍പിരിച്ച ശേഷം കൃത്യമായ ഇടവേളകളില്‍ വിക്കറ്റുകളുമായി വിന്‍ഡീസ് ന്യൂസിലാണ്ടിന്റെ ചേസിംഗിനു വിലങ്ങ് തടി സൃഷ്ടിക്കുകയായിരുന്നു. കാര്‍ലോസ് ബ്രാത്‍വൈറ്റ് വിന്‍ഡീസിനായി മൂന്ന് വിക്കറ്റുമായി ബൗളര്‍മാരില്‍ തിളങ്ങുകയായിരുന്നു. ഫാബിയന്‍ അലന്‍ രണ്ട് വിക്കറ്റും നേടി. അതേ സമയം വാലറ്റത്തില്‍ ഇഷ് സോധി 16 പന്തില്‍ നിന്ന് നേടിയ 39 റണ്‍സാണ് ന്യൂസിലാണ്ടിനെ 330 റണ്‍സിലേക്ക് എത്തിച്ചത്.
