വിരലിന് പരിക്കേറ്റതിനാൽ ടൂർണമെന്റിന്റെ ശേഷിക്കുന്ന മത്സരങ്ങളിൽ നിന്ന് പുറത്തായ ഓൾറൗണ്ടർ ഷാക്കിബ് അൽ ഹസനു പകരക്കാരനായി അനമുൽ ഹഖ് ബിജോയിയെ ബംഗ്ലാദേശ് ടീമിൽ എത്തിച്ചു. ബംഗ്ലാദേശിന്റെ അഭ്യർത്ഥന 2023 ഐസിസി ലോകകപ്പിന്റെ ഇവന്റ് ടെക്നിക്കൽ കമ്മിറ്റി അംഗീകരിച്ചു.
ഓസ്ട്രേലിയയ്ക്കെതിരായ ബംഗ്ലാദേശിന്റെ അവസാന ലീഗ് മത്സരത്തിൽ ഷാകിബ് കളിക്കില്ല എന്ന് ഉറപ്പായിരുന്നു. തിങ്കളാഴ്ച ശ്രീലങ്കയ്ക്കെതിരായ മത്സരത്തിനിടെയിൽ ആയിരുന്നു ഷാക്കിബിന് പരിക്കേറ്റത്. അദ്ദേഹത്തിന്റെ എക്സ്-റേയിൽ വിരലിന് ഒടിവ് കണ്ടെത്തി. തിരികെ കളത്തിൽ എത്താൻ മൂന്നോ നാലോ ആഴ്ചയാകുമെന്ന് കണക്കാക്കപ്പെടുന്നു. അദ്ദേഹം ഇന്ന് ബംഗ്ലാദേശിലേക്ക് പോകും. ഓസ്ട്രേലിയക്ക് എതിരെയുള്ള അവസാന മത്സരം ജയിച്ചാൽ മാത്രമെ ബംഗ്ലാദേശിന് ചാമ്പ്യൻസ് ട്രോഫി യോഗ്യത ലഭിക്കൂ.