ക്രിക്കറ്റ് ലോകകപ്പിൽ ഏറ്റവും കൂടുതൽ സെഞ്ചുറികൾ നേടിയ ടീമെന്ന റെക്കോർഡ് ഇന്ത്യൻ ടീമിന്. ഇന്നലെ ഓസ്ട്രേലിയക്കെതിരായ മത്സരത്തിൽ ശിഖർ ധവാൻ നേടിയ സെഞ്ചുറിയോടെയാണ് ലോകകപ്പിൽ ഏറ്റവും കൂടുതൽ സെഞ്ചുറികൾ നേടിയ ടീമായി ഇന്ത്യ മാറിയത്. ഇന്നലെ ധവാന്റെ സെഞ്ചുറി ലോകകപ്പിൽ ഇന്ത്യയുടെ 27മത്തെ സെഞ്ചുറിയായിരുന്നു. ലോകകപ്പിൽ ഇത് ധവാന്റെ മൂന്നാമത്തെ സെഞ്ചുറികൂടിയായിരുന്നു ഇത്.
26 സെഞ്ചുറികൾ നേടിയ ഓസ്ട്രേലിയയുടെ റെക്കോർഡാണ് ഇന്ത്യ മറികടന്നത്. 23 സെഞ്ചുറികൾ നേടിയ ശ്രീലങ്കയാണ് ഓസ്ട്രേലിയക്ക് പിന്നിലുള്ളത്. ലോകകപ്പിൽ 6 സെഞ്ചുറികൾ നേടിയ സച്ചിൻ ടെണ്ടുൽക്കറുടെ പേരിലാണ് ഏറ്റവും കൂടുതൽ സെഞ്ചുറി നേടിയ താരമെന്ന റെക്കോർഡ്. മത്സരത്തിൽ ധവാന്റെ സെഞ്ചുറിയുടെ പിൻബലത്തിൽ ഇന്ത്യ 36 റൺസിന്‌ ഓസ്ട്രേലിയയെ തോൽപ്പിച്ചിരുന്നു. നേരത്തെ ആദ്യ മത്സരത്തിൽ സൗത്ത് ആഫ്രിക്കക്കെതിരെ രോഹിത് ശർമയും ഇന്ത്യക്ക് വേണ്ടി സെഞ്ചുറി നേടിയിരുന്നു.
