ലോ സ്കോറിംഗ് ത്രില്ലറിൽ നമീബിയയെ വീഴ്ത്തി നെതര്‍ലാണ്ട്സ്, രണ്ടാം വിജയം

ടി20 ലോകകപ്പിൽ തങ്ങളുടെ രണ്ടാം ജയം സ്വന്തമാക്കി നെതര്‍ലാണ്ട്സ്. ഇന്ന് നടന്ന മത്സരത്തിൽ നമീബിയയ്ക്കെതിരെ അഞ്ച് വിക്കറ്റ് ജയം ആണ് ടീം നേടിയത്. മത്സരത്തിൽ ആദ്യം ബാറ്റ് ചെയ്ത നമീബിയ 121/6 എന്ന സ്കോര്‍ നേടിയപ്പോള്‍ 5 വിക്കറ്റ് നഷ്ടത്തിൽ 19.3 ഓവറിലാണ് നെതര്‍ലാണ്ട്സ് വിജയം കുറിച്ചത്.

43 റൺസ് നേടിയ ജാന്‍ ഫ്രൈലിങ്ക് മാത്രമാണ് നമീബിയന്‍ നിരയിൽ തിളങ്ങിയത്. മൈക്കൽ വാന്‍ ലിന്‍ഗന്‍ 20 റൺസും നേടി. നെതര്‍ലാണ്ട്സിന് വേണ്ടി ബാസ് ഡി ലീഡ് 2 വിക്കറ്റ് വീഴ്ത്തി.

ബാറ്റിംഗിലും ബാസ് നിര്‍ണ്ണായക സംഭാവനയാണ് നൽകിയത്. പുറത്താകാതെ 30 റൺസ് നേടിയ ബാസിന് പുറമെ മാക്സ് ഒദൗദ്(35), വിക്രംജിത്ത് സിംഗ്(39) എന്നിവരാണ് നെതര്‍ലാണ്ട്സ് നിരയിലെ പ്രധാന സ്കോറര്‍മാര്‍. നമീബിയയ്ക്കായി ജെജെ സ്മിട്ട് 2 വിക്കറ്റ് നേടി.