കാണികൾ ഇല്ലാതെ ഈ വർഷം ഓസ്ട്രേലിയയിൽ നടക്കുന്ന ടി20 ലോകകപ്പ് നടത്തരുതെന്ന ആവശ്യവുമായി മുൻ പാകിസ്ഥാൻ ക്യാപ്റ്റൻ വസിം അക്രം. കൊറോണ വൈറസ് മഹാമാരിയുമായി ബന്ധപ്പെട്ട പ്രശ്നങ്ങൾ കഴിഞ്ഞതിന് ശേഷം മറ്റൊരു അവസരത്തിൽ ലോകകപ്പ് നടത്തണമെന്നും വസിം അക്രം പറഞ്ഞു. ഈ വർഷം ഒക്ടോബർ – നവംബർ കാലഘട്ടത്തിൽ ഓസ്ട്രേലിയയിൽ നടക്കേണ്ട ടി20 ലോകകപ്പ് ലോകത്താകമാനം നിലവിലുള്ള യാത്ര വിലക്കിനെ തുടർന്ന് മാറ്റിവെക്കാനുള്ള സാധ്യതയുമുണ്ട്.
വ്യക്തിപരമായി കാണികൾ ഇല്ലാതെ മത്സരം നടത്തുന്നതിനോട് താൻ യോജിക്കുന്നില്ലെന്നും എങ്ങനെയാണ് കാണികൾ ഇല്ലാതെ എങ്ങനെ ലോകകപ്പ് പോലുള്ള ഒരു ടൂർണമെന്റ് നടത്തുമെന്നും വസിം അക്രം ചോദിച്ചു. ലോകകപ്പ് എന്നാൽ വലിയ തരത്തിലുള്ള കാണികളും ലോകത്തിന്റെ എല്ലാ ഭാഗത്ത് നിന്ന് വരുന്ന ആരാധകരുമാണ്. എന്നാൽ അടച്ചിട്ട സ്റ്റേഡിയത്തിൽ മത്സരം നടത്തിയാൽ ഇതൊന്നും ആസ്വദിക്കാൻ പറ്റില്ലെന്നും അക്രം പറഞ്ഞു.
അത്കൊണ്ട് തന്നെ ഐ.സി.സി അനുയോജ്യമായ മറ്റൊരു സമയത്തേക്ക് ടി20 ലോകകപ്പ് മാറ്റിവെക്കണമെന്നും കൊറോണ വൈറസ് ബാധയുമായി ബന്ധപ്പെട്ട പ്രശ്നങ്ങൾ കഴിഞ്ഞതിന് ശേഷം ആ സമയത്ത് ശെരിയായ രീതിയിൽ ലോകകപ്പ് നടത്താമെന്നും വസിം അക്രം പറഞ്ഞു.
