കഴിഞ്ഞ ഫെബ്രുവരിയില്‍ മാത്രം അന്താരാഷ്ട്ര അരങ്ങേറ്റം കുറിച്ച ഇന്ത്യയുടെ ജെമീമ റോഡ്രിഗസ് ഐസിസി വനിത ടി20 റാങ്കിംഗില്‍ 14ാം സ്ഥാനത്തേക്ക്. ശ്രീലങ്കയ്ക്കെതിരെയുള്ള പരമ്പരയില്‍ 4-0 നു വിജയിച്ച ഇന്ത്യയ്ക്കായി ജെമീമ മികച്ച ഫോമിലായിരുന്നു. നാല് ഇന്നിംഗ്സുകളില്‍ നിന്നായി താരം 191 റണ്‍സാണ് നേടിയത്.
46 സ്ഥാനങ്ങള്‍ മെച്ചപ്പെടുത്തിയാണ് ജെമീമ റാങ്കിംഗിലെ ആദ്യ 15 സ്ഥാനക്കാരിലേക്ക് എത്തുന്നത്. 518 റാങ്കിംഗ് പോയിന്റാണ് താരം ഇതുവരെ സ്വന്തമാക്കിയിട്ടുള്ളത്. പരമ്പരയിലെ താരവും മികച്ച ബാറ്റിംഗ് താരവുമായി ജെമീമയെ സംഘാടകര്‍ തിരഞ്ഞെടുത്തിരുന്നു.
