ആന്റിഗ്വ ടെസ്റ്റില്‍ വിന്‍ഡീസ് കൂറ്റന്‍ സ്കോറിലേക്ക് കുതിയ്ക്കുന്നു. ടെസ്റ്റിന്റെ ഒന്നാം ദിവസം അവസാനിക്കുമ്പോള്‍ ആതിഥേയര്‍ തങ്ങളുടെ ഒന്നാം ഇന്നിംഗ്സില്‍ 201/2 എന്ന നിലയിലാണ്. 68 ഓവറുകള്‍ നേരിട്ട വിന്‍ഡീസിനു വേണ്ടി 88 റണ്‍സുമായി പുറത്താകാതെ നില്‍ക്കുന്ന ഓപ്പണര്‍ ക്രെയിഗ് ബ്രാത്‍വൈറ്റാണ് ബാറ്റിംഗിനെ നയിക്കുന്നത്. ഡെവണ്‍ സ്മിത്ത്(58), കീറണ്‍ പൊള്ളാര്‍ഡ്(48) എന്നിവരാണ് പുറത്തായ താരങ്ങള്‍. നൈറ്റ് വാച്ച്മാന്‍ ദേവേന്ദ്ര ബിഷൂ ആണ് ബ്രാത്‍വൈറ്റിനു കൂട്ടായി ക്രീസിലുള്ളത്. ഒരു റണ്‍സാണ് താരം ഇതുവരെ നേടിയിട്ടുള്ളത്.
43 റണ്‍സിനു ഒന്നാം ഇന്നിംഗ്സില്‍ പുറത്തായ ബംഗ്ലാദേശിനെതിരെ 158 റണ്‍സിന്റെ ലീഡാണ് ആതിഥേയര്‍ സ്വന്തമാക്കിയിട്ടുള്ളത്. കെര്‍ റോച്ചിന്റെ അഞ്ച് വിക്കറ്റ് സ്പെല്ലാണ് ബംഗ്ലാദേശിന്റെ നടുവൊടിച്ചത്. മിഗ്വല്‍ കമ്മിന്‍സ് 3 വിക്കറ്റുമായി റോച്ചിനു മികച്ച പിന്തുണ നല്‍കി. 25 റണ്‍സ് നേടി ബംഗ്ലാദേശ് നിരയില്‍ ടോപ് സ്കോറര്‍ ആയ ലിറ്റണ്‍ ദാസിന്റെ വിക്കറ്റും കമ്മിന്‍സിനായിരുന്നു. ജേസണ്‍ ഹോള്‍ഡര്‍ രണ്ട് വിക്കറ്റ് നേടി.
കൂടുതൽ കായിക വാർത്തകൾക്ക് : www.facebook.com/FanportOfficial
