ഇന്ത്യൻ ഫാസ്റ്റ് ബൗളർ ജസ്പ്രീത് ബുംറയെ വാനോളം പുകഴ്ത്തി ഇതിഹാസ ഫാസ്റ്റ് ബൗളർ വസിം അക്രം. ലോകത്ത് ഇപ്പോൾ ഏറ്റവും മികച്ച യോർക്കറുകൾ എറിയുന്നത് ബുംറയാണെന്നാണ് വസിം അക്രം അഭിപ്രായപ്പെട്ടിരിക്കുന്നത്. ഓസ്‌ട്രേലിയയിൽ ഇന്ത്യയെ മികച്ച വിജയത്തിലേക്ക് നയിക്കുന്നതിൽ ബുംറയുടെ പങ്കിനെ കുറിച്ച് സംസാരിക്കുകയായിരുന്നു അക്രം.
ഇന്ന് ഇന്റർനാഷണൽ ക്രിക്കറ്റ് കളിക്കുന്നവരിൽ ജസ്പ്രീത് ബുംറയാണ് ഏറ്റവും മികച്ചതും ഏറ്റവും ഫലപ്രദമായതുമായ യോർക്കറുകൾ എറിയുന്നത് എന്നാണു വസീം അക്രം പറയുന്നത്. മറ്റു ഫാസ്റ്റ് ബൗളർമാരിൽ നിന്നും വളരെ വ്യത്യസ്തമായ ബൗളിംഗ് ആക്ഷനാണ് ബുംറക്കുള്ളത്, അത് കൊണ്ട് തന്നെ അത് ഫലപ്രദമായി ഉപയോഗിക്കാൻ ബുംറക്ക് കഴിയുന്നുണ്ട്. അവസാന ഓവറുകളിൽ മികച്ച പ്രകടനം കാഴ്ചവെക്കുന്ന ബുംറ വരുന്ന ലോകകപ്പിൽ ഇന്ത്യയുടെ മുന്നേറ്റത്തിൽ നിർണായകമായ പങ്കു വഹിക്കും എന്നും വസീം അക്രം പറയുന്നു.
