വിരാട് കോഹ്ലിയുടെ ഫോമിൽ തനിക്കോ ടീമിനോ ആശങ്ക ഉണ്ടായിരുന്നില്ല എന്ന് രോഹിത് ശർമ്മ പറഞ്ഞു. വലിയ കളിക്കാർ നിർണായഘട്ടത്തിൽ ടീമിന്റെ രക്ഷരായി നിൽക്കും. അതാണ് കോഹ്ലി കാണിച്ചു തന്നത് എന്ന് രോഹിത് പറഞ്ഞു. കോഹ്ലി 76 റൺസ് എടുത്ത് ടീമിന്റെ ടോപ് സ്കോററും കളിയിലെ താരവും ആയി മാറിയിരുന്നു.
“വിരാടിൻ്റെ ഫോമിൽ ഞാൻ എന്നല്ല, ആർക്കും സംശയമുണ്ടായിരുന്നില്ല. അദ്ദേഹത്തിൻ്റെ നിലവാരം ഞങ്ങൾക്കറിയാം, 15 വർഷമായി അവൻ തൻ്റെ ഗെയിമിൽ മികച്ചു നിൽക്കുന്നു, വലിയ കളിക്കാർ തിരിച്ചുവരും. ഞങ്ങൾക്ക് വളരെ നിർണായകമായ ഇന്നിംഗ്സ് ആണ് വിരാട് ഒരു വശത്ത് നിന്ന് കളിച്ചത്.” രോഹിത് പറഞ്ഞു.
“മറ്റുള്ളവർ അവനു ചുറ്റും കളിച്ചു. ഞങ്ങൾക്ക് ആ ടോട്ടലിൽ എത്താൻ ആയത് കോഹ്ലിയുടെയും ടീമിന്റെയും പ്രയത്നം കൊണ്ടായിരുന്നു. നിങ്ങൾക്ക് വന്ന് സ്വതന്ത്രമായി ബാറ്റ് ചെയ്യാനും സ്കോർബോർഡ് ഉയർത്താനും കഴിയുന്ന വിക്കറ്റുകളല്ല ഇവ, അതിനാൽ ഞങ്ങൾ അത് മനസ്സിലാക്കുന്നു. കഴിയുന്നിടത്തോളം സമയം ആരെങ്കിലും ബാറ്റ് ചെയ്യാൻ ഞങ്ങൾ ആഗ്രഹിച്ചു, വിരാട് അത് നന്നായി ചെയ്തു. അവിടെയാണ് വിരാടിൻ്റെ അനുഭവം. ചുറ്റുമുള്ള മറ്റ് ആളുകൾ നന്നായി കളിച്ചു, അക്സറിൻ്റെ 47 റൺസും വളരെ നിർണായകമായിരുന്നു.” രോഹിത് പറഞ്ഞു.
