വിജയ് ഹസാരെ ട്രോഫിയിൽ ആദ്യ മത്സരത്തിൽ കേരളം സൗരാഷ്ട്രയെ തോൽപ്പിച്ചു. മൂന്ന് വിക്കറ്റിന്റെ വിജയമാണ് കേരളം നേടിയത്. സൗരാഷ്ട്ര ഉയർത്തിയ 186 എന്ന വിജയലക്ഷ്യം 47.4 ഓവറിലേക്ക് ആണ് കേരളം മറികടന്നത്. 76 പന്തിൽ നിന്ന് 60 റൺസ് എടുത്ത അബ്ദുൽ ബാസിത് ആണ് കേരളത്തിന്റെ രക്ഷകനായത്‌.കേരളത്തിന്റെ ബാറ്റർമാരിൽ ആർക്കും വലിയ സ്കോർ നേടാൻ ആകാത്ത ദിവസത്തിൽ ബാസിത് നല്ല ഒരു ഇന്നിങ്സ് തന്നെ കളിച്ചു.
9 ഫോറും ഒരു സിക്സും അടങ്ങുന്നത് ആയിരുന്നു ബാസിതിന്റെ ഇന്നിംഗ്സ്. ക്യാപ്റ്റൻ സഞ്ജു സാംസൺ 30 റൺസ് എടുത്തു. 28 റൺസ് എടുത്ത അഖിൽ, 21 റൺസുമായി പുറത്താകാതെ നിന്ന ശ്രേയസ് ഗോപാൽ എന്നിവരും കേരളത്തിന്റെ ജയത്തിൽ നിർണായമായി.
ഇന്ന് ആദ്യം കേരളം മികച്ച ബൗളിംഗ് പ്രകടനം കാഴ്ചവെച്ചു. സൗരാഷ്ട്ര 49.1 ഓവറിൽ 185 റൺസിന് ഓളൗട്ട് ആയി. നാലു വിക്കറ്റുമായി അഖിൻ കേരളത്തിനായി മികച്ച ബൗളിംഗ് കാഴ്ചവെച്ചു. 10 ഓവറിൽ 39 റൺസ് മാത്രം വഴങ്ങിയാണ് അഖിൻ നാലു വിക്കറ്റ് എടുത്തത്.
ബേസിൽ തമ്പി, ശ്രേയസ് ഗോപാൽ എന്നിവർ രണ്ടു വിക്കറ്റ് വീതവും വീഴ്ത്തി. അഖിൽ, ബേസിൽ എന്നിവർ ഒരോ വിക്കറ്റും വീഴ്ത്തി. 98 റൺസ് എടുത്ത വിശ്വരാജ്സിങ് ജഡേജ ആണ് സൗരാഷ്ട്രയുടെ ടോപ് സ്കോറർ ആയത്‌. വേറെ ആർക്കും സൗരാഷ്ട്ര നിരയിൽ നിന്ന് തിളങ്ങാൻ ആയില്ല.
