രോഹന്‍ കുന്നുമ്മലിന്റെ വെടിക്കെട്ട് ബാറ്റിംഗ് പ്രകടനം, ഗോവയ്ക്കെതിരെ വിജയവുമായി കേരളം

രോഹന്‍ കുന്നുമ്മലിന്റെ വെടിക്കെട്ട് ബാറ്റിംഗ് പ്രകടനത്തിന്റെ മികവിൽ ഗോവയ്ക്കെതിരെ വിജയ് ഹസാരെ ട്രോഫിയിൽ തകര്‍പ്പന്‍ വിജയം നേടി കേരളം. ഇന്ന് ആദ്യം ബാറ്റ് ചെയ്ത ഗോവ 241 റൺസ് നേടിയപ്പോള്‍ കേരളം 5 വിക്കറ്റ് വിജയം ആണ് നേടിയത്.

74 പന്തിൽ നിന്ന് തന്റെ ശതകം തികച്ച രോഹന്‍ 101 പന്തിൽ നിന്ന് 134 റൺസ് നേടി പുറത്താകുകയായിരുന്നു. 17 ഫോറും 4 സിക്സും അടങ്ങിയതായിരുന്നു രോഹന്റെ ഇന്നിംഗ്സ്. സച്ചിന്‍ ബേബി 51 റൺസ് നേടിയപ്പോള്‍ കേരളം 38.1 ഓവറിൽ 5 വിക്കറ്റ് നഷ്ടത്തിൽ വിജയം നേടി. സച്ചിന്‍ ബേബി തന്റെ അര്‍ദ്ധ ശതകം തികച്ച് ടീമിന്റെ വിജയ സമയത്ത് ക്രീസിലുണ്ടായിരുന്നു. വത്സൽ ഗോവിന്ദ് 22 റൺസ് നേടി പുറത്തായി.

ആദ്യം ബാറ്റ് ചെയ്ത ഗോവ 241/8 എന്ന സ്കോര്‍ നേടുകയായിരുന്നു. 69 റൺസ് നേടിയ ദര്‍ശന്‍ മിസാലും 32 റൺസ് നേടിയ ദീപ്‍രാജ് ഗവോങ്കാറും 34 റൺസ് നേടിയ സുയാഷ് പ്രഭുദേശായിയും ആണ് ഗോവന്‍ നിരയിൽ തിളങ്ങിയത്. കേരളത്തിന് വേണ്ടി അഖിൽ സക്കറിയ 3 വിക്കറ്റും ബേസിൽ എന്‍പി 2 വിക്കറ്റും നേടി.