ഐബിഎസിന് വേണ്ടി അനുലിന്റെ ഒറ്റയാള്‍ പോരാട്ടം, കെയര്‍സ്റ്റാക്ക് വൈറ്റിന് ജയം ഒരുക്കി വിഷ്ണുവും നിഖിലും

- Advertisement -

ഐബിഎസ് ബ്ലൂവിനെതിരെ 6 വിക്കറ്റ് വിജയവുമായി കെയര്‍സ്റ്റാക്ക് വൈറ്റ്. ഇന്ന് നടന്ന ടിപിഎല്‍ രണ്ടാം റൗണ്ട് മത്സരത്തില്‍ ആദ്യം ബാറ്റ് ചെയ്ത ഐബിഎസ് ബ്ലൂവിന് വേണ്ടി 28 പന്തില്‍ 45 റണ്‍സുമായി അനുല്‍ പുറത്താക്കാതെ നിന്നപ്പോള്‍ മറ്റു താരങ്ങള്‍ക്കാര്‍ക്കും തന്നെ കാര്യമായ സംഭാവന ബാറ്റിംഗില്‍ ചെയ്യാനായില്ല. 4 പന്തില്‍ പുറത്താകാതെ 7 റണ്‍സ് നേടിയ ടാര്‍സന്‍ ബെനിറ്റ് ആണ് ടീമിലെ രണ്ടാമത്തെ ടോപ് സ്കോറര്‍. 8 ഓവറില്‍ 3 വിക്കറ്റ് നഷ്ടത്തില്‍ 64 റണ്‍സ് ആണ് ഐബിഎസ് നേടിയത്.

കെയര്‍സ്റ്റാക്കിന്റെ തുടക്കം നിരാശാജനകമായിരുന്നു. കൃഷ്ണന്‍ ഉണ്ണി എറിഞ്ഞ ആദ്യ ഓവറില്‍ തന്നെ ഓപ്പണര്‍മാരായ റൂബന്‍ ചാക്കോയും അരുണ്‍ ദാസും തിരികെ മടങ്ങിയപ്പോള്‍ സ്കോര്‍ ബോര്‍ഡില്‍ റണ്‍സ് പൂജ്യമായിരുന്നു. യദു കൃഷ്ണനും നിഖിലും രണ്ടാം വിക്കറ്റില്‍ 38 റണ്‍സ് കൂട്ടുകെട്ട് നേടി. 17 പന്തില്‍ 21 റണ്‍സാണ് നിഖില്‍ നേടിയത്. മത്സരം അവസാന മൂന്നോവറിലേക്ക് കടന്നപ്പോള്‍ 34 റണ്‍സായിരുന്നു ടീം നേടേണ്ടിയിരുന്നത്.

ആറാം ഓവര്‍ എറിഞ്ഞ രഞ്ജിത്ത് കൃഷ്ണന്റെ ഓവറിലാണ് മത്സരം കെയര്‍സ്റ്റാക്ക് തിരിച്ച് പിടിച്ചത്. ആദ്യ പന്തില്‍ സിക്സ് നേടിയ ശേഷം ഓവറില്‍ നിഖിലിനെ നഷ്ടമായെങ്കിലും പിന്നീട് ക്രീസിലെത്തിയ വിഷ്ണു എസ് നായര്‍ രണ്ട് സിക്സും ഒരു ഫോറും നേടിയപ്പോള്‍ ഓവറില്‍ നിന്ന് മാത്രം 24 റണ്‍സ് പിറന്നു.

അവസാന രണ്ടോവറില്‍ 10 റണ്‍സ് നേടേണ്ടിയിരുന്ന കെയര്‍സ്റ്റാക്കിന് യദുവിന്റെ(14) വിക്കറ്റ് നഷ്ടമായെങ്കിലും 7 പന്തില്‍ നിന്ന് 22 റണ്‍സുമായി പുറത്താകാതെ നിന്ന വിഷ്ണു എസ് നായര്‍ ടീമിന്റ വിജയം ഉറപ്പാക്കി. ഐബിഎസിന് വേണ്ടി കൃഷ്ണന്‍ ഉണ്ണി മൂന്ന് വിക്കറ്റ് വീഴ്ത്തി.

Advertisement