ടെക്നോപാര്‍ക്ക് കമ്പനികള്‍ തമ്മിലുള്ള ക്രിക്കറ്റ് ടൂര്‍ണ്ണമെന്റായ ടെക്നോപാര്‍ക്ക് പ്രീമിയര്‍ ലീഗിന് ഡിസംബര്‍ 8ന് തുടക്കം. മൂന്ന് ഘട്ടങ്ങളിലായി നടക്കുന്ന ടൂര്‍ണ്ണമെന്റിൽ 149 ടീമുകളാണ് പങ്കെടുക്കുന്നത്. ആദ്യ ഘട്ട മത്സരങ്ങളിൽ 93 ടീമുകള്‍ മാറ്റുരയ്ക്കും. ആദ്യ ഘട്ടത്തിലെ 42 മത്സരങ്ങളുടെ ഫിക്സ്ച്ചറുകളാണിപ്പോള്‍ പുറത്ത് വിട്ടിരിക്കുന്നത്.
രണ്ടാം ഘട്ടത്തിൽ 40 ടീമുകളാണ് മത്സരിക്കുന്നത്. ഇവര്‍ക്ക് പുറമെ ആദ്യ ഘട്ടത്തില്‍ നിന്ന് യോഗ്യത നേടിയെത്തുന്ന 8 ടീമുകളും ഈ ഘട്ടത്തിൽ പോരാട്ടത്തിനിറങ്ങും. മൂന്നാം ഘട്ടത്തെ ചാമ്പ്യന്‍സ് റൗണ്ട് എന്നാണ് വിശേഷിപ്പിക്കുന്നത്. പേര് പോലെ തന്നെ കഴിഞ്ഞ വര്‍ഷത്തെ ടൂര്‍ണ്ണമെന്റിലെ ആദ്യ 16 സ്ഥാനക്കാരും രണ്ടാം റൗണ്ടിൽ നിന്ന് യോഗ്യത നേടുന്ന എട്ട് ടീമുകളുമാണ് ഈ ഘട്ടത്തിൽ മത്സരത്തിനിറങ്ങുക.
