ടിപിഎല്‍ 2020ന്റെ രണ്ടാം ഘട്ടത്തില്‍ മികച്ച വിജയം കരസ്ഥമാക്കി ജിഡിഎസ് ഇലവന്‍. ഇന്ന് നടന്ന മത്സരത്തില്‍ ട്രിവ് ആന്‍ഡ് സിംപ്ലോജിക്സിനെയാണ് ജിഡിഎസ് പരാജയപ്പെടുത്തിയത്. ഇന്നത്തെ മത്സരത്തില്‍ ആദ്യം ബാറ്റ് ചെയ്ത ട്രിവ് ആന്‍ഡ് സിംപ്ലോജിക്സ് 9 വിക്കറ്റ് നഷ്ടത്തില്‍ 72 റണ്‍സാണ് നേടിയത്. നൗഷാദ്(17), സലീം രാജന്‍(13), വിശ്വനാഥ്(12) എന്നിവരാണ് ടീമിനായി ബാറ്റിംഗില്‍ തിളങ്ങിയത്. ബൗളിംഗില്‍ ജിഡിഎസിന് വേണ്ടി നിഖില്‍, ജിഎസ് അരുണ്‍, അരുണ്‍ എസ് നായര്‍ എന്നിവര്‍ രണ്ട് വീതം വിക്കറ്റ് നേടി.
ബാറ്റിംഗിനെത്തിയ ജിഡിഎസ് ലക്ഷ്യം 6.4 ഓവറിലാണ് സ്വന്തമാക്കിയത്. 12 പന്തില്‍ അഞ്ച് സിക്സ് സഹിതം 35 റണ്‍സുമായി പുറത്താകാതെ നിന്ന അജിത്താണ് ടീമിന്റെ വിജയ ശില്പി. ടോപ് ഓര്‍ഡറില്‍ ശ്രീകാന്ത് 19 റണ്‍സുമായും ജിഎസ് അരുണ്‍ 12 റണ്‍സും നേടി ടീമിന്റെ വിജയത്തില്‍ പങ്കാളിയായി.
