ടെക്നോപാര്‍ക്ക് പ്രീമിയര്‍ ലീഗ് 2020ന്റെ രണ്ടാം ഘട്ട റൗണ്ട് മത്സരങ്ങള്‍ പുരോഗമിക്കുമ്പോള്‍ ആക്സിയന്‍സിന് ഇന്ന് 8 വിക്കറ്റ് വിജയം. എതിരാളികളായ ഐക്കണ്‍ ബ്ലാക്സിനെതിരെയാണ് ആക്സിയന്‍സിന്റെ മികച്ച വിജയം. ആദ്യം ബാറ്റ് ചെയ്ത ഐക്കണ്‍ ബ്ലാക്സ് 7.4 ഓവറില്‍ 50 റണ്‍സിന് ഓള്‍ഔട്ട് ആയപ്പോള്‍ 2 വിക്കറ്റ് നഷ്ടത്തില്‍ 5 ഓവറില്‍ ആക്സിയന്‍സ് വിജയം ഉറപ്പാക്കി.
മൂന്ന് വീതം വിക്കറ്റ് നേടിയ അഖില്‍ ബാബു, അനീഷ് കുമാര്‍ എന്നിവര്‍ക്കൊപ്പം രണ്ട് വിക്കറ്റ് വീഴ്ത്തി പ്രേം കൃഷ്ണയും മികവ് പുലര്‍ത്തിയാണ് ഐക്കണിനെ എറിഞ്ഞൊതുക്കുവാന്‍ ആക്സിയന്‍സിന് സഹായകരമായത്. 12 റണ്‍സ് എക്സ്ട്രാസ് രൂപത്തില്‍ വന്നപ്പോള്‍ 10 വീതം റണ്‍സ് നേടി പ്രവീണ്‍, വൈഷ്ണവ് എന്നിവരാണ് ഐക്കണ്‍ ബ്ലാക്സിന്റെ ബാറ്റ്സ്മാന്മാരില്‍ രണ്ടക്ക സ്കോറിലേക്ക് എത്തി.
ആക്സിയന്‍സിനായി ബാറ്റിംഗില്‍ 19 പന്തില്‍ പുറത്താകാതെ 27 റണ്‍സ് നേടി ടിഎസ് ശ്രീനിയാണ് ടീമിനെ വിജയത്തിലേക്ക് നയിച്ചത്. അനീഷ് കുമാര്‍ 9 റണ്‍സുമായി പുറത്താകാതെ നിന്നപ്പോള്‍ ഹരീഷ് രാജ് 7 റണ്‍സ് നേടി.
