ടെക്നോപാര്‍ക്ക് പ്രീമിയര്‍ ലീഗ് 2023-24ന്റെ രജിസ്ട്രേഷന് ആരംഭിച്ചു. ടെക്നോപാര്‍ക്കുമായി ചേര്‍ന്ന് മുരുഗന്‍ ക്രിക്കറ്റ് ക്ലബ് ആണ് ഐടി ജീവനക്കാരുടെ ആവേശമായ ടൂര്‍ണ്ണമെന്റിന്റെ സംഘാടകര്‍. നവംബര്‍ 17 ആണ് രജീസ്ട്രേഷന്റെ അവസാന തീയ്യതി. മുന്‍ വര്‍ഷങ്ങളിലേതിന് സമാനമായി നൂറിലധികം കമ്പനികളിൽ നിന്നുള്ള ടീമുകള്‍ ടെക്നോപാര്‍ക്കിന്റെ ക്രിക്കറ്റ് മാമാങ്കത്തിൽ പങ്കെടുക്കുമെന്നാണ് പ്രതീക്ഷിക്കപ്പെടുന്നത്. ഡോ. എപിജെ പാര്‍ക്ക് ആണ് ഈ വര്‍ഷത്തെ ടൈറ്റിൽ സ്പോൺസര്‍മാര്‍.
കഴിഞ്ഞ വര്‍ഷത്തെ ഫൈനലില്‍ അലയന്‍സ് വൈറ്റ്സിനെ പരാജയപ്പെടുത്തി H&R ബ്ലോക്ക് ആണ് ചാമ്പ്യന്മാരായത്. രജിസ്ട്രേഷന് വേണ്ടി https://murugancricketclub.com/dr-apj-park-tpl-2023/ എന്ന ലിങ്ക് സന്ദര്‍ശിക്കുക.
മുരുഗന്‍ ക്രിക്കറ്റ് ക്ലബ്ബിനെക്കുറിച്ച്
മുന്‍ വര്‍ഷങ്ങളിലെന്ന പോലെ തിരുവനന്തപുരത്തെ പ്രമുഖ ക്രിക്കറ്റ് ക്ലബ്ബായ മുരുഗന്‍ ക്രിക്കറ്റ് ക്ലബ്ബാണ് ടെക്നോപാര്‍ക്കിനു വേണ്ടി, 110ഓളം കമ്പനികളില്‍ നിന്നുള്ള 130ല്‍ പരം ടീമുകള്‍ പങ്കെടുക്കുന്ന ടൂര്‍ണ്ണമെന്റ് നടത്തുന്നത്. മൂന്ന് മുതൽ നാല് മാസത്തോളം നീണ്ട് നില്‍ക്കുന്ന ടൂര്‍ണ്ണമെന്റ് വിജയിക്കുക എന്നത് ടെക്നോപാര്‍ക് കമ്പനികളുടെ അഭിമാനപ്പോരാട്ടമായാണ് കണക്കാക്കപ്പെടുന്നത്.
അഞ്ച് പതിറ്റാണ്ടുകള്‍ക്ക് മുമ്പ് തിരുവനന്തപുരം പുത്തന്‍ തെരുവിലെ കുറച്ച് ചെറുപ്പക്കാര്‍ ചേര്‍ന്ന് തങ്ങളുടെ ക്രിക്കറ്റ് അഭിരുചി വളര്‍ത്തുന്നതിനായി ഒത്തുകൂടുകയും, 1967ല്‍ മുരുഗന്‍ ക്രിക്കറ്റ് ക്ലബ്ബ് എന്ന പേരിലൊരു ക്രിക്കറ്റ് ക്ലബ്ബ് രൂപീകരിക്കുകയും ചെയ്യുകയായിരുന്നു.
1977 തിരുവനന്തപുരം എ ഡിവിഷനില്‍ കളിക്കുവാനാരംഭിച്ച ക്ലബ്ബ് പിന്നീടങ്ങോട്ട് കേരളത്തങ്ങോളമിങ്ങോളം നിരവധി ടൂര്‍ണ്ണമെന്റുകളില്‍ തങ്ങളുടെ മികവ് തെളിയിക്കുകയും ഒട്ടേറെ മികച്ച താരങ്ങളെ വാര്‍ത്തെടുക്കുകയും ചെയ്യുകയുണ്ടായി.
1983 അട്ടക്കുളങ്ങര ഗവ. ഹൈസ്കൂളില്‍ മാറ്റിംഗ് വിക്കറ്റില്‍ പരിശീലനമാരംഭിച്ച ക്ലബ്ബിനു പക്ഷേ 1989ല്‍ ചില സാങ്കേതിക കാരണത്താല്‍ അനുമതി നിഷേധിക്കപ്പെടുകയും മറ്റൊരു സ്ഥലം കണ്ടെത്തേണ്ടതായും വരുകയായിരുന്നു. 1997 സ്വന്തമായി സ്ഥലം വാങ്ങിയ ക്ലബ്ബ് ഒട്ടനവധി ചെറുപ്പക്കാര്‍ക്ക് പരിശീലനത്തിനുള്ള അവസരം സൃഷ്ടിക്കുകയായിരുന്നു.
