ദക്ഷിണാഫ്രിക്കയുടെ മറക്കാനാഗ്രഹിക്കുന്ന ലങ്കന്‍ ടെസ്റ്റ് പരമ്പരയ്ക്ക് അവസാനം. ഇന്ന് കൊളംബോ ടെസ്റ്റിന്റെ നാലാം ദിവസം 290 റണ്‍സിനു പുറത്താകുമ്പോള്‍ ത്യൂണിസ് ഡി ബ്രൂയിന്‍ പൊരുതി നേടിയ ശതകം മാത്രമാണ് ദക്ഷിണാഫ്രിക്കയ്ക്ക് ഊറ്റം കൊള്ളാവുന്ന പ്രകടനം. 139/5 എന്ന നിലയില്‍ നാലാം ദിവസം ബാറ്റിംഗ് ആരംഭിച്ച ദക്ഷിണാഫ്രിക്ക ആറാം വിക്കറ്റില്‍ സ്കോര്‍ 236 വരെ എത്തിച്ചിരുന്നു.
123 റണ്‍സാണ് ത്യൂണിസ്-ബാവുമ കൂട്ടുകെട്ട് നേടിയത്. 63 റണ്‍സ് നേടിയ ടെംബ ബാവുമയെ പുറത്താക്കി രംഗന ഹെരാത്ത് ആണ് മത്സരത്തില്‍ ശ്രീലങ്ക കാത്തിരുന്ന ബ്രേക്ക് നല്‍കിയത്. അതിനു ശേഷം ക്വിന്റണ്‍ ഡിക്കോക്കിനെയും ഹെരാത്ത് മടക്കിയപ്പോള്‍ ലങ്കന്‍ ജയം ഉറപ്പാകുകയായിരുന്നു. കാഗിസോ റബാഡയുമായി(18) ചേര്‍ന്ന് ത്യൂണിസ് ഡി ബ്രൂയിന്‍ പൊരുതി നോക്കിയെങ്കിലും ശതകം പൂര്‍ത്തിയാക്കിയ ഉടനെ ഡി ബ്രൂയിനെ ഹെരാത്ത് മടക്കി. മൂന്ന് പന്തുകള്‍ക്കപ്പുറം റബാഡയുടെ ചെറുത്ത്നില്പിനെ ദില്‍രുവന്‍ പെരേരയും അവസാനിപ്പിച്ചു. 86.5 ഓവറില്‍ 290 റണ്‍സ് നേടിയാണ് ദക്ഷിണാഫ്രിക്കയുടെ രണ്ടാം ഇന്നിംഗ്സ് അവസാനിച്ചത്. മത്സരത്തില്‍ ശ്രീലങ്ക 199 റണ്‍സിനു വിജയിച്ചു.
ശ്രീലങ്കയ്ക്കായി രംഗന ഹെരാത്ത് ആറും ദില്‍രുവന്‍ പെരേര അകില ധനന്‍ജയ എന്നിവര്‍ രണ്ട് വീതം വിക്കറ്റും നേടി.
കൂടുതൽ കായിക വാർത്തകൾക്ക് : www.facebook.com/FanportOfficial
