ടി20 പരമ്പരയിലെ മൂന്നാം മത്സരത്തിൽ ശ്രീലങ്കയ്ക്ക് അനായാസ വിജയം. 8 വിക്കറ്റിന്റെ വിജയം ആണ് ശ്രീലങ്ക സിംബാബ്വേയ്ക്കെതിരെ നേടിയത്. ആദ്യം ബാറ്റ് ചെയ്ത സിംബാബ്വേ 191/8 എന്ന സ്കോര് നേടിയപ്പോള് 17.4 ഓവറിൽ ശ്രീലങ്ക 2 വിക്കറ്റ് നഷ്ടത്തിൽ 193 റൺസ് നേടി വിജയം കരസ്ഥമാക്കി.
സിംബാബ്വേയ്ക്കായി മരുമാനി 51 റൺസുമായി ടോപ് സ്കോറര് ആയപ്പോള് 28 റൺസ് നേടിയ സിക്കന്ദര് റാസയാണ് രണ്ടാമത്തെ ടോപ് സ്കോറര്. 11 പന്തിൽ 23 റൺസ് നേടിയ ഷോൺ വില്യംസും 15 പന്തിൽ 26 റൺസ് നേടിയ റയാന് ബര്ളും മികച്ച രീതിയിൽ തുടങ്ങിയെങ്കിലും വലിയ സ്കോറിലേക്ക് അത് മാറ്റുവാന് സാധിക്കാതെ പോയത് ടീമിന് തിരിച്ചടിയായി. ശ്രീലങ്കയ്ക്കായി ദുഷന് ഹേമന്ത മൂന്നും ദുഷ്മന്ത ചമീര രണ്ട് വിക്കറ്റും നേടി.
ശ്രീലങ്കയ്ക്കായി പുറത്താകാതെ 43 പന്തിൽ 73 റൺസ് നേടിയ കമിൽ മിഷാര ടോപ് സ്കോറര് ആയപ്പോള് കുശൽ പെരേര 26 പന്തിൽ 46 റൺസും നേടി പുറത്താകാതെ നിന്നു. പതും നിസ്സങ്ക 33 റൺസും കുശൽ മെന്ഡിസ് 30 റൺസും നേടി.
