പാക്കിസ്ഥാനെതിരെ മൂന്നാം ടി20യില് കൂറ്റന് സ്കോര് നേടി ദക്ഷിണാഫ്രിക്ക. ഓപ്പണര്മാരായ ജാന്നേമന് മലനും എയ്ഡന് മാര്ക്രവും അര്ദ്ധ ശതകങ്ങള് നേടിയപ്പോള് ജോര്ജ്ജ് ലിന്ഡേ(22), വാന് ഡെര് ഡൂസ്സന്(20 പന്തില് പുറത്താകാതെ 34) എന്നിവരും തിളങ്ങിയപ്പോള് ആദ്യം ബാറ്റ് ചെയ്ത ദക്ഷിണാഫ്രിക്ക 5 വിക്കറ്റ് നഷ്ടത്തില് 203 റണ്സ് നേടുകയായിരുന്നു.
ഒന്നാം വിക്കറ്റില് 108 റണ്സാണ് മാര്ക്രം- മലന് കൂട്ടുകെട്ട് നേടിയത്. ഇതില് മാര്ക്രം 31 പന്തില് 63 റണ്സ് നേടി ആദ്യം പുറത്താകുകയായിരുന്നു. മലന് 40 പന്തില് 55 റണ്സും നേടി. പാക്കിസ്ഥാന് വേണ്ടി മുഹമ്മദ് നവാസ് രണ്ട് വിക്കറ്റ് നേടി.
