പുറം വേദന കാരണം ബുദ്ധിമുട്ടുന്ന ഇന്ത്യയുടെ മധ്യനിര ബാറ്റ്‌സ്മാൻ ശ്രേയസ് അയ്യർ രഞ്ജി ട്രോഫിയിൽ നിന്നും വിട്ടു നിൽക്കും. ഇന്ത്യൻ ടീമിൽ നിന്ന് പുറത്താക്കപ്പെട്ട താരം ഫെബ്രുവരി 23 മുതൽ മുംബൈ ക്രിക്കറ്റ് അസോസിയേഷൻ്റെ ബികെസി ഗ്രൗണ്ടിൽ നടക്കുന്ന ബറോഡയ്‌ക്കെതിരായ മുംബൈയുടെ രഞ്ജി ട്രോഫി ക്വാർട്ടർ ഫൈനൽ മത്സരത്തിൽ പങ്കെടുക്കില്ല എന്ന് ഉറപ്പായി. ഇന്ന് പ്രഖ്യാപിച്ച മുംബൈ ടീമിൽ അദ്ദേഹം ഇല്ല.
പരിക്ക് കാരണമാണ് ശ്രേയസ് വിട്ടു നിൽക്കുന്നത്. നേരത്തെ ഇംഗ്ലണ്ടിനെതിരായ ആദ്യ രണ്ടു ടെസ്റ്റിൽ ശ്രേയസ് ഉണ്ടായിരുന്നു. രണ്ട് ടെസ്റ്റിലും നല്ല പ്രകടനമായിരുന്നില്ല കാഴ്ചവെച്ചത്. ഹൈദരാബാദിലും വിശാഖപട്ടണത്തും നടന്ന ആദ്യ രണ്ട് ടെസ്റ്റുകളിൽ ആയി 35, 13, 27, 29 എന്നീ സ്‌കോറുകൾ ആയിരുന്നു അയ്യർ നേടിയത്. തുടർന്ന് ഇന്ത്യ ബാക്കി മൂന്ന് ടെസ്റ്റുകളിൽ നിന്ന് അയ്യറിനെ ഒഴിവാക്കി. ഇത് ഫോം ഔട്ട് ആയതു കൊണ്ടാണോ പരിക്ക് കൊണ്ടാണോ എന്ന് ബി സി സി ഐ വ്യക്തമാക്കിയിരുന്നില്ല.
ഇനി ഐ പി എല്ലിനു മുന്നെ ഫിറ്റ്നസ് വീണ്ടെടുക്കാൻ ആകും അയ്യർ ശ്രമിക്കുക.
