മുൻ ഇന്ത്യൻ താരം സുരേഷ് റെയ്ന അന്താരാഷ്ട്ര ക്രിക്കറ്റിൽ നിന്ന് വിരമിച്ചത് പരസ്യമാക്കുന്നതിന് മുൻപ് തന്റെ തീരുമാനം ബി.സി.സി.ഐയെ അറിയിച്ചിരുന്നെന്ന് ബി.സി.സി.ഐ. വിരമിക്കൽ പ്രഖ്യാപിക്കുന്നതിന് ഒരു ദിവസം മുൻപ് തന്നെ താരം ബി.സി.സി.സിയെ വിവരങ്ങൾ അറിയിച്ചിരുന്നെന്ന് ബി.സി.സി.ഐ വ്യക്തമാക്കി.
സാധാരണ ഗതിയിൽ താരങ്ങൾ വിരമിക്കൽ പ്രഖ്യാപിക്കുന്നതിന് മുൻപ് ബി.സി.സി.ഐയുമായി ബന്ധപെടാറുണ്ട്. അത് റെയ്ന പിന്തുടർന്നിട്ടുണ്ടെന്നും ബി.സി.സി.ഐ വ്യക്തമാക്കി. മുൻ ഇന്ത്യൻ ക്യാപ്റ്റൻ മഹേന്ദ്ര സിംഗ് ധോണി വിരമിക്കൽ പ്രഖ്യാപിച്ചതിന് പിന്നാലെയാണ് സുരേഷ് റെയ്നയും അന്താരാഷ്ട്ര ക്രിക്കറ്റിൽ നിന്ന് വിരമിക്കൽ പ്രഖ്യാപിച്ചത്. ഇന്ത്യക്ക് വേണ്ടി 18 ടെസ്റ്റുകളും 226 ഏകദിന മത്സരങ്ങളും 78 ടി20 മത്സരങ്ങളും കളിച്ച താരമാണ് റെയ്ന.
