ഡർഹാമിനെതിരായ റോയൽ ലണ്ടൻ ഏകദിന കപ്പ് മത്സരത്തിന് ഇടയിൽ കാൽമുട്ടിന് പരിക്കേറ്റതിനെ തുടർന്ന് പൃഥ്വി ഷാ ഇന്ത്യയിലേക്ക് മടങ്ങുന്നു. ഈ സീസണിൽ കൗണ്ടിയിൽ പൃഥ്വി ഷാ കളിക്കില്ല. നോർത്താംപ്ടൺഷെയർ തിങ്കളാഴ്ച ഒരു ഔദ്യോഗിക പ്രസ്താവനയിലൂടെ പരിക്കിന്റെ വാർത്ത പങ്കുവെച്ചു.
ഡർഹാമിനെതിരായ മത്സരത്തിൽ ഫീൽഡിംഗിനിടെ ആയിരുന്നു പൃഥ്വിയുടെ കാൽമുട്ടിന് പരിക്കേറ്റത്. സ്റ്റീൽബാക്കിനായി പൃഥ്വിക്ക് മൂന്ന് ഇന്നിംഗ്സുകൾ മാത്രമേ കളിക്കാനാകൂവെങ്കിലും ടൂർണമെന്റിലെ ടോപ് സ്കോററായാണ് താരം ടൂർണമെന്റ് വിടുന്നത്. സോമർസെറ്റിനെതിരെ ഇരട്ട സെഞ്ച്വറി നേടി റെക്കോർഡ് കുറിച്ച ഷാ അടുത്ത മത്സരത്തിൽ 76 പന്തിൽ 15 ഫോറും ഏഴ് സിക്സും സഹിതം പുറത്താകാതെ 125 റൺസ് നേടിയിരുന്നു.
