ശ്രീലങ്കയില്‍ പരമ്പര സ്വന്തമാക്കുവാന്‍ ബാറ്റ്സ്മാന്മാരില്‍ നിന്ന് മികച്ച റണ്‍സ് വരേണ്ടതുണ്ടെന്ന് പറഞ്ഞ് മോമിനുള്‍ ഹക്ക്. കഴിഞ്ഞ കുറച്ച് പരമ്പരകളിലായി പരിശോധന നടത്തുകയാണെങ്കില്‍ ബാറ്റിംഗ് യൂണിറ്റ് ആണ് പരാജയപ്പെടുന്നതെന്നും ശ്രീലങ്കയില്‍ അവരില്‍ നിന്ന് റണ്‍സ് വന്നാല്‍ മാത്രമേ ടീമിന് പരമ്പര വിജയിക്കാനാകുകയുള്ളുവെന്ന് ബംഗ്ലാദേശ് ടെസ്റ്റ് നായകന്‍ പറഞ്ഞു.
സാഹചര്യങ്ങള്‍ അനുവദിക്കുകയാണെങ്കില്‍ താന്‍ കൂടുതല്‍ പേസര്‍മാരെ ടീമില്‍ ഉള്‍പ്പെടുത്തുവാന്‍ തയ്യാറാണെന്നും ഭാവിയിലേക്ക് മികച്ച പേസ് ബൗളിംഗ് സംഘത്തെ വളര്‍ത്തിയെടുക്കേണ്ടത് ഏറെ ആവശ്യമാണെന്നും മോമിനുള്‍ പറഞ്ഞു. പേസര്‍മാരും സ്പിന്നര്‍മാരും കുറച്ച് നാളായി മികവ് പുലര്‍ത്തുന്നുണ്ടെങ്കിലും ടീമിന് തിരിച്ചടിയായി മാറുന്നത് ബാറ്റിംഗിലെ പരാജയം ആണെന്ന് മോമിനുള്‍ ഹക്ക് തുറന്ന് സമ്മതിച്ചു.
കഴിഞ്ഞ അഞ്ച് – ആറ് ടെസ്റ്റ് മത്സരങ്ങളില്‍ വേണ്ട ഫലം ലഭിച്ചില്ലെന്നും വിജയം സ്വന്തമാക്കാനാകുന്നില്ലെങ്കില്‍ ടീമില്‍ കൂടുതല്‍ പരീക്ഷണങ്ങള്‍ നടത്തുവാന്‍ സാധിക്കുകയില്ലെന്നും മോമിനുള്‍ വ്യക്തമാക്കി.
