മുല്ലൻപൂരിൽ നടന്ന ഐപിഎൽ 2025 എലിമിനേറ്ററിൽ ഗുജറാത്ത് ടൈറ്റൻസിനെ 20 റൺസിന് തോൽപ്പിച്ച് മുംബൈ ഇന്ത്യൻസ് കിരീട പ്രതീക്ഷകൾ സജീവമാക്കി. രോഹിത് ശർമ്മയുടെ തകർപ്പൻ 81 റൺസും, ജോണി ബെയർസ്റ്റോയുടെ (22 പന്തിൽ 47), ഹാർദിക് പാണ്ഡ്യയുടെ (9 പന്തിൽ പുറത്താകാതെ 22) വെടിക്കെട്ട് ബാറ്റിംഗും മുംബൈയെ ആദ്യം ബാറ്റ് ചെയ്തപ്പോൾ 228/5 എന്ന വലിയ സ്കോറിലെത്തിച്ചു.
രോഹിതും ബെയർസ്റ്റോയും ചേർന്ന് വെറും 7.2 ഓവറിൽ 84 റൺസിൻ്റെ ഓപ്പണിംഗ് കൂട്ടുകെട്ടുണ്ടാക്കി. ടൈറ്റൻസ് ബൗളർമാരുടെ മോശം പ്രകടനവും ഫ്ലാറ്റ് പിച്ചും അവർ മുതലെടുത്തു. സൂര്യകുമാർ യാദവ് (20 പന്തിൽ 33), തിലക് വർമ്മ (11 പന്തിൽ 25) എന്നിവർ മധ്യ ഓവറുകളിൽ ആവേശം നിലനിർത്തി. അവസാന ഓവറുകളിൽ ഹാർദിക് പാണ്ഡ്യയുടെ വെടിക്കെട്ട് ബാറ്റിംഗ് മുംബൈയെ ഐപിഎൽ പ്ലേ ഓഫ് മത്സരത്തിലെ ഏറ്റവും ഉയർന്ന സ്കോറുകളിലൊന്നിൽ എത്തിച്ചു.
229 റൺസ് വിജയലക്ഷ്യം പിന്തുടർന്ന ഗുജറാത്ത് ടൈറ്റൻസിന് തുടക്കത്തിൽ തന്നെ ക്യാപ്റ്റൻ ശുഭ്മാൻ ഗില്ലിനെ നഷ്ടമായി. എന്നാൽ സായ് സുദർശൻ 49 പന്തിൽ 80 റൺസ് നേടി ഇന്നിംഗ്‌സിന് അടിത്തറയിട്ടു. കുശാൽ മെൻഡിസ് (20), വാഷിംഗ്ടൺ സുന്ദർ (24 പന്തിൽ 48) എന്നിവരുമായി നിർണായക കൂട്ടുകെട്ടുകൾ ഉണ്ടാക്കി ഗുജറാത്തിനെ വിജയത്തിന് അടുത്തെത്തിച്ചു. എന്നാൽ ബുമ്രയുടെ മികച്ച ഒരു ഓവർ കളി മാറ്റി. ബുമ്ര വാഷിങ്ടൺ സുന്ദറിനെ പുറത്താക്കിയതോടെ ഗുജറാത്ത് പതറാൻ തുടങ്ങി.
16-ാം ഓവറിൽ റിച്ചാർഡ് ഗ്ലീസണിന് സുദർശൻ വിക്കറ്റ് നഷ്ടപ്പെട്ടതോടെ മുംബൈ കളിയിൽ പിടിമുറുക്കി. ജസ്പ്രീത് ബുംറ മികച്ച പ്രകടനം കാഴ്ചവെച്ച് 27 റൺസിന് 1 വിക്കറ്റ് വീഴ്ത്തി. ട്രെൻ്റ് ബോൾട്ട് (56 റൺസിന് 2 വിക്കറ്റ്), അരങ്ങേറ്റക്കാരൻ അശ്വനി കുമാർ (28 റൺസിന് 1 വിക്കറ്റ്) എന്നിവരും നിർണായക പ്രകടനം അവസാനം നടത്തി. രാഹുൽ തെവാട്ടിയയുടെയും ഷാരൂഖ് ഖാൻ്റെയും അവസാന ഓവറുകളിലെ ശ്രമങ്ങൾ ഫലം കാണാതെ ഗുജറാത്ത് 20 ഓവറിൽ 208/6 എന്ന സ്കോറിൽ ഒതുങ്ങി.
ഇതോടെ മുംബൈ ഇന്ത്യൻസ് ഫൈനലിൽ പ്രവേശിക്കാൻ ക്വാളിഫയർ 1 ലെ തോറ്റ പഞ്ചാബുമായി ഏറ്റുമുട്ടും. ഗുജറാത്ത് ടൈറ്റൻസിൻ്റെ പോരാട്ടം എലിമിനേറ്ററോടെ അവസാനിച്ചു.
