അഡിലെയ്ഡ് ടെസ്റ്റില്‍ ഓസ്ട്രേലിയയ്ക്കായി ഓപ്പണിംഗിനിറങ്ങുക ജോ ബേണ്‍സും മാത്യു വെയിഡും ആയിരിക്കുമെന്ന് സൂചന നല്‍കി ടിം പെയിന്‍. ഡേവിഡ് വാര്‍ണര്‍ക്കൊപ്പം ആര് ഓപ്പണ്‍ ചെയ്യുമെന്ന പ്രതിസന്ധി ഒരു ഘട്ടത്തില്‍ ഓസ്ട്രേലിയന്‍ ക്യാമ്പ് നേരിട്ടിരുന്നുവെങ്കിലും പിന്നീട് താരത്തിന് പരിക്കേറ്റതോടെ വില്‍ പുകോവസ്കിയും ജോ ബേണ്‍സും ഓപ്പണിംഗ് ദൗത്യം ഏറ്റെടുക്കുമെന്നാണ് കരുതിയത്. സന്നാഹ മത്സരത്തില്‍ വില്‍ പുകോവസ്കിയ്ക്കം പരിക്കേറ്റതോടെ ഇപ്പോള്‍ ജോ ബേണ്‍സിനൊപ്പം ആര് ഓപ്പണ്‍ ചെയ്യുമെന്ന പ്രതിസന്ധിയാണ് ഓസ്ട്രേലിയ നേരിടുന്നത്.
മാത്യു വെയിഡ് ടീമിന് വേണ്ടി ഓപ്പണിംഗ് ദൗത്യം ഏറ്റെടുക്കുവാന്‍ സമ്മതിച്ചത് വളരെ വലിയ കാര്യമാണെന്ന് ടിം പെയിന്‍ വ്യക്തമാക്കി. ഫസ്റ്റ് ക്ലാസ്സില്‍ ഇതുവരെ താരം അത് ചെയ്തിട്ടില്ലെങ്കിലും ഇപ്പോള്‍ ടീമിന്റെ പ്രതിസന്ധി ഘട്ടത്തില്‍ പിന്തുണയുമായി താരം മുന്നോട്ട് വരികയായിരുന്നുവെന്നും പെയിന്‍ സൂചിപ്പിച്ചു.
ഓസ്ട്രേലിയയ്ക്ക് വേണ്ടി ഷോര്‍ട്ട്-ബോള്‍ ഫോര്‍മാറ്റില്‍ താരം ഓപ്പണിംഗിറങ്ങി മികവ് പുലര്‍ത്തിയിട്ടുള്ളതാണെന്നും ഓസ്ട്രേലിയന്‍ നായകന്‍ അഭിപ്രായപ്പെട്ടു.
