ഇന്ത്യ ഓപ്പണിംഗ് ജോഡികളായ കോഹ്ലിയെയും രോഹിത് ശർമ്മയെയും മാറ്റരുത് എന്ന് വെസ്റ്റിൻഡീസ് ഇതിഹാസം ബ്രയാൻ ലാറ. ലോകകപ്പിൽ ആദ്യ മൂന്ന് മത്സരങ്ങളിൽ ഈ ഓപ്പണിംഗ് കൂട്ടുകെട്ട് പരാജയപ്പെട്ടിരുന്നു. കോഹ്ലി മൂന്ന് ഇന്നിംഗ്സിലും രണ്ടക്കം കണ്ടിരുന്നില്ല.രോഹിത് അവസാന രണ്ട് ഇന്നിംഗ്സിലും റൺസ് കണ്ടെത്താൻ പ്രയാസപ്പെട്ടു.
“ഇന്ത്യക്ക് ഇടത്-വലത് ഓപ്പണിംഗ് കൂട്ടുകെട്ട് കളിക്കാനുള്ള ഓപ്ഷൻ ഉണ്ടായിരുന്നു. പക്ഷെ ക്യാപ്റ്റൻ രോഹിത് ശർമ്മയും വിരാട് കോഹ്‌ലിയും അവരുടെ ഫ്രാഞ്ചൈസിക്ക് വേണ്ടി ഓപ്പണറായി ബാറ്റുകൊണ്ട് മികച്ച പ്രകടനം കാഴ്ചവച്ചവർ ആണ്. അവരെ തന്നെ ഇന്ത്യ ഓപ്പണിംഗിൽ നിലനിർത്തണം. മാറ്റം വരുത്തുന്നു എങ്കിൽ കോഹ്ലിയെ വൺ ഡൗണിനുൻ താഴേക്ക് മാറ്റേണ്ടി വരും. ”സ്റ്റാർ സ്‌പോർട്‌സിൽ ലാറ പറഞ്ഞു.
“ഇന്ത്യയുടെ കോമ്പിനേഷൻ നല്ലതാണെന്നും ഇന്ത്യ അവരെ പിന്തുണക്കണം എന്നുൻ ഞാൻ വിശ്വസിക്കുന്നു. യുഎസ്എയിലെ ബാറ്റിംഗ് സാഹചര്യങ്ങൾ മികച്ചതായിരുന്നില്ല. നിങ്ങൾ മത്സരങ്ങൾ വിജയിക്കുന്നുണ്ട്. അതുകൊണ്ട് തന്നെ നിങ്ങൾ മാറ്റങ്ങൾ വരുത്തണം എന്ന് ഞാൻ വിശ്വസിക്കുന്നില്ല, ”അദ്ദേഹം കൂട്ടിച്ചേർത്തു.
