അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന ആവേശകരമായ ഐപിഎൽ 2025 ഫൈനലിൽ പഞ്ചാബ് കിംഗ്‌സിനെ ആറ് റൺസിന് തോൽപ്പിച്ച് റോയൽ ചാലഞ്ചേഴ്‌സ് ബാംഗ്ലൂർ തങ്ങളുടെ നീണ്ട ഐപിഎൽ കിരീടത്തിനായുള്ള കാത്തിരിപ്പിന് വിരാമമിട്ടു. ആഘോഷങ്ങൾക്കിടയിലും വിരാട് കോഹ്ലി ടെസ്റ്റ് ക്രിക്കറ്റിനെ പുകഴ്ത്തി. അടുത്തിടെ ടെസ്റ്റ് ക്രിക്കറ്റിൽ നിന്ന് വിരമിച്ച മുൻ ആർസിബി ക്യാപ്റ്റൻ, ഈ വിജയം വളരെ സവിശേഷമാണെന്നും എന്നാൽ തൻ്റെ കണ്ണിൽ ടെസ്റ്റ് ക്രിക്കറ്റിൻ്റെ മഹത്വത്തിന് ഇത് അഞ്ചു പടി താഴെയാണെന്നും പറഞ്ഞു.
“എൻ്റെ കരിയറിലെ ഏറ്റവും മികച്ച നിമിഷങ്ങളിൽ ഒന്നാണിത്, പക്ഷേ ഇത് ടെസ്റ്റ് ക്രിക്കറ്റിന് അഞ്ചു പടി താഴെയാണ്, ടെസ്റ്റ് ക്രിക്കറ്റിനെ ഞാൻ അത്രയധികം സ്നേഹിക്കുകയും അതിന് അത്രയധികം മൂല്യം കൽപ്പിക്കുകയും ചെയ്യുന്നു. ഈ ഫോർമാറ്റിനെ ബഹുമാനിക്കാൻ യുവതാരങ്ങളോട് ഞാൻ അഭ്യർത്ഥിക്കുന്നു,” ഫൈനലിന് ശേഷം കോഹ്ലി പറഞ്ഞു.
“കാരണം, നിങ്ങൾ ടെസ്റ്റ് ക്രിക്കറ്റിൽ മികച്ച പ്രകടനം കാഴ്ചവെക്കുകയാണെങ്കിൽ, ലോകത്ത് എവിടെയും നിങ്ങൾ നടക്കുമ്പോൾ ആളുകൾ നിങ്ങളെ കണ്ണിൽ നോക്കി, കൈ കുലുക്കി, നന്നായി കളിച്ചു എന്ന് പറയും. അതിനാൽ, ലോക ക്രിക്കറ്റിൽ എല്ലായിടത്തും ബഹുമാനം നേടണമെങ്കിൽ, ടെസ്റ്റ് ക്രിക്കറ്റ് തിരഞ്ഞെടുക്കുക, അതിന് നിങ്ങളുടെ ഹൃദയവും ആത്മാവും നൽകുക” കോഹ്ലി പറഞ്ഞു.
